चितवन । बागमती प्रदेश सरकारले बाढी तथा विपद्बाट प्रभावित नागरिकलाई राहतमा मात्र सीमित नराखी रोजगारी, शिक्षा, स्वास्थ्य र आयआर्जनसँग जोड्ने योजना अघि बढाएको छ।
बागमती प्रदेश स्वास्थ्य तथा सामाजिक विकासमन्त्री गिरबहादुर तामाङले प्रभावित नागरिकको पुनःस्थापना र आत्मनिर्भरता प्रदेश सरकारको प्राथमिकतामा रहेको बताए। उनका अनुसार स्थानीय तहको क्षमताअनुसार प्रभावितलाई रोजगारीमा जोड्ने तथा उद्योगी, व्यवसायी र होटल व्यवसायीसँग समन्वय गरी रोजगारीका अवसर सिर्जना गर्ने तयारी भइरहेको छ।
मन्त्री तामाङले प्रभावित नागरिकलाई योग्यता र क्षमताअनुसार रोजगारी, स्वरोजगार तथा व्यवसायमा फर्काउन आवश्यक रहेको बताए। स्वास्थ्य र शिक्षाबाट प्रभावितलाई वञ्चित हुन नदिने नीति रहेको पनि उनले जानकारी दिए।
नुवाकोटको लिखु गाउँपालिकास्थित क्षेत्रपाल माध्यमिक विद्यालयमा करिब २०० बालबालिकाका लागि शिक्षा, खाना र आवासको व्यवस्था गरिएको तथा विद्यालय र छात्रावासका लागि करिब १० लाख रुपैयाँ बराबरका सामग्री उपलब्ध गराइएको उनले बताए।
बाढी प्रभावित क्षेत्रमा आवतजावत सहज बनाउन प्रदेश सरकारले तत्काल पाँचवटा तुइन सञ्चालनमा ल्याएको जनाएको छ। आगामी दिनमा प्रभावित नागरिकलाई सीपमूलक तालिम, रोजगारी र आयआर्जनका अवसरसँग जोड्दै दीर्घकालीन पुनःस्थापनामा जोड दिने प्रदेश सरकारको योजना छ।
Discussion about this post