काठमाडौं । भोटेकोशी नदीमा आएको बाढीले रसुवा र नुवाकोटका जलविद्युत् आयोजनामा ठूलो क्षति पुर्याएपछि त्यसको असर दोस्रो बजारमा सूचीकृत सम्बन्धित कम्पनीको सेयर मूल्यमा समेत देखिएको छ।
बाढीबाट रसुवा–नुवाकोट क्षेत्रमा रहेका १३ जलविद्युत् आयोजनामा क्षति पुगेको प्रारम्भिक विवरण छ। तीमध्ये ६ वटा कम्पनी नेपाल स्टक एक्सचेन्जमा सूचीकृत छन्। आयोजना सञ्चालनमा अनिश्चितता बढेसँगै लगानीकर्ताको मनोबल कमजोर हुँदा ती कम्पनीको सेयरमा बिक्री चाप बढेको देखिएको छ।
प्रभावित कम्पनीमध्ये त्रिशूली जलविद्युत् कम्पनीको सेयर मूल्य ३०.४८ प्रतिशत, रसुवागढी हाइड्रोपावरको २७.०९ प्रतिशत, मैलुङखोलाको २२.७८ प्रतिशत, चिलिमे जलविद्युत्को २२.१८ प्रतिशत र माथिल्लो मैलुङखोलाको १४.०३ प्रतिशतले घटेको जनाइएको छ। साञ्जेन जलविद्युत् कम्पनीको सेयर मूल्यमा भने ४.२५ प्रतिशतको गिरावट आएको छ।
बाढीका कारण केही आयोजनाका बाँध, विद्युत्गृह, सुरुङ, प्रसारण लाइन तथा अन्य संरचनामा ठूलो क्षति पुगेको छ। सडक तथा यातायात अवरुद्ध भएकाले प्राविधिक र बिमा कम्पनीका सर्भेयर आयोजनास्थलमा पुग्न नसक्दा क्षतिको पूर्ण विवरण आउन बाँकी रहेको कम्पनीहरूले जनाएका छन्।
रसुवागढी हाइड्रोपावरमा विद्युत्गृह तथा सुरुङमा ठूलो क्षति पुगेको बताइएको छ। त्यस्तै, त्रिशूली–३ बी जलविद्युत् आयोजनामा पनि विद्युत्गृह, हेडबक्स, आवास तथा कार्यालय भवनमा क्षति पुगेको छ।
स्वतन्त्र ऊर्जा उत्पादकहरूको संस्था नेपाल (इपान) ले बाढीबाट प्रभावित आयोजनाको पुनर्निर्माणलाई तीव्रता दिन सरकार र निजी क्षेत्रबीच सहकार्य आवश्यक रहेको जनाएको छ। बिमा दाबी तथा क्षतिको यकिन विवरण संकलनपछि पुनर्निर्माण अघि बढाउने तयारी भइरहेको छ।
बाढीबाट भएको भौतिक क्षतिसँगै आयोजना पुनः सञ्चालनमा लाग्ने समय, वित्तीय दायित्व र पुनर्निर्माणको लागतबारे अनिश्चितता रहेकाले यसको प्रभाव प्रभावित जलविद्युत् कम्पनी र लगानीकर्तामा परेको देखिएको छ।
Discussion about this post