काठमाडौं । नेपाली कांग्रेसको १५औँ केन्द्रीय महाधिवेशनअन्तर्गत ४३ जिल्लाका ३ हजार ३९६ वडामा वडा अधिवेशन सम्पन्न भएको छ।
कांग्रेस केन्द्रीय निर्वाचन समितिका अनुसार ताप्लेजुङदेखि कञ्चनपुरसम्मका ४३ जिल्लाका निर्धारित वडामा अधिवेशन सम्पन्न भएको हो। अधिवेशनबाट सम्बन्धित वडाका वडा कार्यसमिति तथा क्षेत्रीय प्रतिनिधि चयन भएका छन्।
वडा अधिवेशन सम्पन्न भएका जिल्लामा ताप्लेजुङ, पाँचथर, संखुवासभा, धनकुटा, सोलुखुम्बु, उदयपुर, झापा, मोरङ, महोत्तरी, रामेछाप, काभ्रे, सिन्धुपाल्चोक, चितवन, भक्तपुर, ललितपुर, काठमाडौं, गोरखा, कास्की, मनाङ, पर्वत, स्याङ्जा, बागलुङ र नवलपुर रहेका छन्।
यस्तै पाल्पा, अर्घाखाँची, गुल्मी, रुकुम पूर्व, रुकुम पश्चिम, रोल्पा, प्युठान, डोल्पा, जुम्ला, मुगु, हुम्ला, जाजरकोट, दैलेख, सुर्खेत, डोटी, अछाम, दार्चुला, बैतडी, कञ्चनपुर र कैलालीमा पनि वडा अधिवेशन सम्पन्न भएको छ।
केन्द्रीय निर्वाचन समितिका सदस्य सचिव राजु कटुवालका अनुसार रसुवा, नुवाकोट र धादिङबाहेक बाँकी ३१ जिल्लामा आज वडा अधिवेशन हुँदैछ।
वडा अधिवेशनसँगै कांग्रेसको १५औँ महाधिवेशनका लागि तल्लो तहबाट नेतृत्व तथा प्रतिनिधि चयन प्रक्रिया अघि बढेको छ। पार्टीको केन्द्रीय कार्यसमितिको निर्णयअनुसार १५औँ केन्द्रीय महाधिवेशन असोज १६ देखि १९ गतेसम्म काठमाडौंमा आयोजना हुँदैछ।
महाधिवेशनका लागि वडा तह हुँदै क्षेत्रीय तथा जिल्ला तहका अधिवेशन सम्पन्न गर्ने तयारी कांग्रेसले अघि बढाएको छ।
Discussion about this post