काठमाडौँ । जापानको आइची प्रिफेक्चर र नागोया सहरमा २०औँ एसियाली खेलकुद प्रतियोगिता सुरु भएको छ। अक्टोबर ४ सम्म सञ्चालन हुने प्रतियोगितामा नेपालले २१ खेलमा १३५ खेलाडी सहभागी गराउँदैछ।
नेपाली टोलीमा ७८ पुरुष र ५७ महिला खेलाडी छन्। खेलाडी, प्रशिक्षक, व्यवस्थापक, प्राविधिक, मेडिकल टिम तथा अन्य पदाधिकारीसहित नेपालको प्रतिनिधिमण्डलमा २११ जना सहभागी छन्। अघिल्लो हाङ्झाउ एसियाडमा २५३ नेपाली खेलाडी सहभागी भएका थिए।
यसपटक नेपालले कबड्डी, क्रिकेट र महिला भलिबलसहित विभिन्न २१ खेलमा प्रतिस्पर्धा गर्दैछ। कबड्डीमा सबैभन्दा बढी २४ खेलाडी छन्। पुरुष क्रिकेटमा १५, महिला भलिबलमा १२, उसुमा १०, करातेमा आठ र बक्सिङमा सात खेलाडीले नेपालको प्रतिनिधित्व गर्नेछन्।
यस्तै एथलेटिक्स, जुडो, टेबल टेनिस र कुस्तीमा समान ६, पौडी र टेनिसमा पाँच–पाँच तथा ब्याडमिन्टन, गल्फ र सफ्ट टेनिसमा चार–चार खेलाडी सहभागी छन्। तेक्वान्दोमा तीन तथा आर्चरी, साइक्लिङ, र्याफ्टिङ एन्ड क्यानोइङ, स्केट एन्ड स्केटबोर्डिङ र स्क्वासमा दुई–दुई खेलाडीले प्रतिस्पर्धा गर्नेछन्।
प्रतियोगिताको उद्घाटन समारोहमा बक्सिङका चन्द्रबहादुर थापामगर र कबड्डीकी मानमती विष्टले नेपालको राष्ट्रिय झण्डा बोकेका छन्। थापामगरले गत वर्ष दुबईमा भएको विश्व बक्सिङ च्याम्पियनसिपमा कांस्य पदक जितेका थिए भने विष्टको कप्तानीमा नेपाली महिला कबड्डी टोलीले हाङ्झाउ एसियाडमा कांस्य पदक जितेको थियो।
नेपालले एसियाडको तयारीका लागि लामो समयदेखि विशेष प्रशिक्षण सञ्चालन गर्दै आएको थियो। प्रतियोगिता नजिकिएसँगै विभिन्न खेलका खेलाडीलाई बन्द प्रशिक्षणमा राखेर तयारीलाई तीव्र पारिएको थियो। यसपटक नेपालले स्वर्णसहित दोहोरो अङ्कमा पदक जित्ने लक्ष्य राखेको छ।
नेपालले सन् १९५१ मा भारतमा भएको पहिलो एसियाली खेलकुददेखि निरन्तर सहभागिता जनाउँदै आएको छ। सन् १९८६ मा दक्षिण कोरियाको सोलमा भएको १०औँ एसियाडमा पहिलो पटक पदक जितेको नेपालले त्यसयता विभिन्न संस्करणमा पदक हासिल गर्दै आएको छ।
अघिल्लो हाङ्झाउ एसियाडमा नेपालले करातेकी एरिका गुरुङबाट रजत तथा महिला कबड्डी टोलीबाट कांस्य पदक जितेको थियो। यसपटक पनि विभिन्न खेलबाट पदकको अपेक्षा गरिएको छ।
एसियाडमा चीन, जापान, दक्षिण कोरिया, भारतलगायत एसियाका बलिया खेल राष्ट्रबीच पदकका लागि प्रतिस्पर्धा हुँदैछ। प्रतियोगितामा ४३ खेल समावेश छन् र ४५ देश तथा क्षेत्रका खेलाडी सहभागी छन्।
नेपालका लागि भने एसियाड अन्तर्राष्ट्रिय स्तरमा आफ्नो खेल क्षमता परीक्षण गर्ने महत्वपूर्ण अवसर बनेको छ। सीमित स्रोतसाधनबीच तयारी गरेर जापान पुगेका नेपाली खेलाडीले कस्तो प्रदर्शन गर्छन् र नेपालको पदक लक्ष्य कति पूरा हुन्छ भन्नेमा नेपाली खेलप्रेमीको ध्यान केन्द्रित भएको छ।
Discussion about this post