काठमाडौं । सङ्घीय संसद्को प्रतिनिधिसभा बैठक आज बिहीबार बस्दैछ। बैठक दिउँसो १ बजे सङ्घीय संसद् भवन, नयाँ बानेश्वरमा बस्ने कार्यतालिका छ।
बैठकमा राष्ट्रिय क्षेत्राधिकारभन्दा बाहिरका सामुद्रिक जैविक विविधताको संरक्षण र दिगो प्रयोगसम्बन्धी अन्तर्राष्ट्रिय सम्झौतामाथि सामान्य छलफल हुने कार्यसूची रहेको छ।
कानुन, न्याय तथा संसदीय मामिलामन्त्री सोविता गौतमले उक्त सम्झौतामाथि सामान्य छलफल गरियोस् भन्ने प्रस्ताव प्रस्तुत गर्नेछिन्। त्यसपछि सांसदहरूले सम्झौताका विषयमा आ–आफ्ना धारणा राख्नेछन्।
सम्झौताले राष्ट्रिय क्षेत्राधिकारभन्दा बाहिरका समुद्री क्षेत्रमा जैविक विविधताको संरक्षण, दिगो उपयोग तथा समुद्री स्रोतको व्यवस्थापनसम्बन्धी विषय समेटेको छ।
यसैबीच, बिहीबार सङ्घीय संसद्अन्तर्गतका अन्तर्राष्ट्रिय सम्बन्ध तथा पर्यटन समिति, राज्य व्यवस्था तथा सुशासन समिति र विकास, आर्थिक मामिला तथा सुशासन समितिको बैठक पनि बस्दैछ।
ती समितिहरूले आ–आफ्नो कार्यक्षेत्रसँग सम्बन्धित समसामयिक विषय तथा विभिन्न प्रस्तावमाथि छलफल गर्ने कार्यक्रम रहेको छ।
Discussion about this post