कञ्चनपुर । दोधारा चाँदनी नगरपालिका -७ देउराली घाटस्थित जोगबुढा नदीमा डुब्न लागेका ७२ वर्षीय मानबहादुर गुरुङको सशस्त्र प्रहरीले जीवितै उद्धार गरेको छ। दोधारा चाँदनी नगरपालिका -९ का गुरुङको चप्पल नदी किनारमा भेटिएपछि आफन्तले नदीमा डुबेको हुन सक्ने आशंका गरेका थिए।
खोजीका लागि सशस्त्र प्रहरी बल नेपाल सीमा सुरक्षा गुल्म हेडक्वार्टर देवीस्थानबाट सशस्त्र प्रहरी नायव उपरीक्षक प्रभातकुमार गौतमको कमाण्डमा १५ जनाको टोली, पाँच जना विपद् व्यवस्थापन तालिमप्राप्त सशस्त्र प्रहरीसहित रबर बोट तथा उद्धार सामग्री लिएर खटिएको थियो। टोलीले बिहान ११ः५५ बजेदेखि रबर बोटको सहायताले खोजी सुरु गरेको थियो। खोजीका क्रममा दिउँसो करिब २ बजे घटनास्थलभन्दा करिब ५०० मिटर तल नदीको पानीमा गुरुङको टाउको देखिएपछि टोली तत्काल उक्त स्थानमा पुगेको थियो।
पानीमा डुब्दै गरेको अवस्थामा अचेत भेटिएका गुरुङलाई सशस्त्र प्रहरीले तत्काल उद्धार गरी उपचारका लागि दोधारा चाँदनी अस्पताल पठाएको छ। सशस्त्र प्रहरी बल नेपाल नं. ३५ शैलेश्वरी गण हेडक्वार्टर कञ्चनपुरका प्रमुख सशस्त्र प्रहरी उपरीक्षक प्रेमप्रकाश सिग्देलका अनुसार नदी किनारको झाडीमा लुकिछिपी बसेका गुरुङ नदीमा हाम फालेको हुन सक्ने प्रारम्भिक आशंका गरिएको छ।
Discussion about this post