काठमाडौं । निर्वाचन आयोगले दल त्याग गरी अन्य राजनीतिक दलमा प्रवेश गरेका दुई उपाध्यक्षसहित १० जना स्थानीय तहका निर्वाचित जनप्रतिनिधिको पद रिक्त भएको जनाएको छ।
आयोगले आज सूचना प्रकाशित गर्दै सम्बन्धित स्थानीय तहका जनप्रतिनिधिले दल त्याग गरेको पुष्टि भएपछि उनीहरूको निर्वाचित पद रिक्त भएको जानकारी दिएको हो।
आयोगका अनुसार मधेस प्रदेशका चार, कोशी प्रदेशका तीन, बागमती प्रदेशका दुई र सुदूरपश्चिम प्रदेशका एक जनप्रतिनिधिको पद रिक्त भएको छ।
मधेस प्रदेशमा धनुषाको शहीदनगर नगरपालिका–५ का वडाध्यक्ष तनुकलाल कुसियैत, विदेह नगरपालिका–६ का वडाध्यक्ष जयराम मण्डल, कमला नगरपालिका–५ का वडाध्यक्ष शीबा पासमान र मिथिला नगरपालिका–२ का वडाध्यक्ष बिहारी महतो कोइरीको पद रिक्त भएको छ।
कोशी प्रदेशमा खोटाङको केपिलासगढी गाउँपालिका–३ का वडाध्यक्ष तुलाराम राई, बराहपोखरी गाउँपालिकाका उपाध्यक्ष भुवलराज राई तथा मोरङको धनपालथान गाउँपालिका–५ का वडाध्यक्ष गयानन्द सरदारको पद रिक्त भएको आयोगले जनाएको छ।
त्यस्तै, बागमती प्रदेशअन्तर्गत दोलखाको जिरी नगरपालिका–६ का वडाध्यक्ष मर्जितबहादुर खड्का र वडा नं. ३ का वडाध्यक्ष खेटराज घिमिरे तथा सुदूरपश्चिमको कैलालीस्थित बर्दगोरिया गाउँपालिकाका उपाध्यक्ष गणेशराज गिरीको पद पनि रिक्त भएको छ।
आयोगका अनुसार २०७९ को स्थानीय तह निर्वाचनमा विभिन्न राजनीतिक दलबाट निर्वाचित भई पछि अन्य दलमा प्रवेश गरेका जनप्रतिनिधिबारे सम्बन्धित दलका केन्द्रीय समितिको निर्णयसहितको विवरण आयोगमा प्राप्त भएको थियो।
राजनीतिक दलसम्बन्धी ऐन, २०७३ र राजनीतिक दलसम्बन्धी नियमावली, २०७४ मा भएको व्यवस्थाअनुसार दल त्याग गरेको देखिएपछि सम्बन्धित जनप्रतिनिधिको पद रिक्त भएको आयोगले जनाएको छ।
Discussion about this post