काठमाडौं । आज देशभर गणेश चतुर्थी र ऋषिपञ्चमी पर्व मनाइँदैछ। ऋषिपञ्चमीका अवसरमा हिन्दु धर्मावलम्बी महिलाहरूले सप्तऋषि र अरुन्धतीको पूजा–आराधना गरी परिवारको सुख, शान्ति र समृद्धिको कामना गर्ने परम्परा छ।
भदौ शुक्ल पञ्चमीका दिन मनाइने ऋषिपञ्चमीमा महिलाहरू बिहानै स्नान गरी अत्रि, गौतम, भारद्वाज, जमदग्नि, वशिष्ठ, कश्यप र विश्वामित्रसहित अरुन्धतीको पूजा गर्ने गर्छन्। यस अवसरमा नदी, खोला, ताल तथा पोखरीमा स्नान गरी धार्मिक अनुष्ठान गर्ने चलन छ।
ऋषिपञ्चमीका अवसरमा काठमाडौंको टेकु, मूलपानीलगायत देशभरका ऋषेश्वर तथा ऋषिसम्बन्धी मन्दिरमा बिहानैदेखि श्रद्धालु महिलाको भीड लागेको छ।
यस वर्ष गणेश चतुर्थी र ऋषिपञ्चमी एकै दिन परेको नेपाल पञ्चाङ्ग निर्णायक समितिबाट स्वीकृत पात्रोमा उल्लेख छ। गणेश चतुर्थीका अवसरमा पनि देशभर गणेश भगवान्को पूजा तथा दर्शन गर्ने भक्तजनको चहलपहल बढेको छ।
ऋषिपञ्चमीसँगै यस वर्षको तीज पर्व औपचारिक रूपमा समापन हुँदैछ। रसुवाको भोटेकोशी क्षेत्रमा भएको विनाशकारी बाढीका कारण यस वर्ष तीजका कार्यक्रम विगतको तुलनामा सामान्य रूपमा मनाइएको थियो।
Discussion about this post