ललितपुर । नेपाली कांग्रेस केन्द्रीय कार्यसम्पादन समितिको बैठक आगामी भदौ २८ गते आइतबार दिउँसो २ बजे बस्ने भएको छ।
पार्टी केन्द्रीय कार्यालय, बीपी स्मृति भवन, बीपी नगर, ललितपुरमा बस्ने बैठकमा केन्द्रीय कार्यसम्पादन समितिका पदाधिकारी तथा सदस्यसँगै विभिन्न प्रदेशका सभापतिहरूको समेत सहभागिता रहने कांग्रेसले जनाएको छ।
बैठकमा भोटेकोशी बाढीबाट प्रभावित क्षेत्रको राहत, पुनःस्थापना तथा पुनर्निर्माणका विषयमा छलफल हुने भएको छ। बाढीबाट भएको जनधनको क्षति, प्रभावित नागरिकको उद्धार तथा राहत वितरणमा पार्टीले खेल्नुपर्ने भूमिकाबारे पनि समीक्षा गरिने जनाइएको छ।
त्यस्तै, बैठकमा समसामयिक राजनीतिक तथा सांगठनिक विषय, पार्टी संगठन सुदृढीकरण र आगामी राजनीतिक कार्यदिशाका विषयमा समेत छलफल हुने बताइएको छ।
कांग्रेसले केन्द्रीय कार्यसम्पादन समितिका पदाधिकारी, सदस्य तथा प्रदेश सभापतिहरूलाई बैठकमा अनिवार्य उपस्थित हुन निर्देशन दिएको छ।
Discussion about this post