चितवन । कृष्णभीरमा पहिरोका कारण ग्यासका बुलेट काठमाडौं जान नसकेपछि विभिन्न जिल्लामा रहेका ग्यास उद्योगबाट ५३ हजार ४६९ सिलिन्डर एलपी ग्यास भरेर काठमाडौं पठाइएको छ।
उपत्यकामा ग्यासको अभाव हुन नदिन चितवनसहित बारा, पर्सा, मकवानपुर, धनुषा, नवलपुर र नवलपरासीका उद्योगबाट ग्यास भरेर बुधबार काठमाडौं पठाइएको नेपाल एलपी ग्यास उद्योग संघका केन्द्रीय सदस्य विमल कालाखेतीले जानकारी दिए।
चितवनस्थित नेपाल ग्यास उद्योग नारायणीबाट एचपी, नेपाल, गीता र सागर कम्पनीका गरी ४ हजार ५४३ सिलिन्डर पठाइएको छ। यस्तै, धनुषास्थित नोबेल ग्यास उद्योगबाट सागर उद्योगका ५ हजार ६१८ सिलिन्डर काठमाडौं पठाइएको छ।
बाराका विभिन्न उद्योगबाट सीताश्रीका १ हजार ६०९, मेट्रो एसटिसी र सूर्यका २ हजार १२१, उग्रचण्डी र श्रीमायाका ३ हजार १८१ तथा सिद्धार्थ र मेट्रो एसटिसीका १ हजार ९२ सिलिन्डर भरेर पठाइएको छ।
यसैगरी, पर्सास्थित सुपर ग्यास उद्योगबाट हिमालका ६६३ र मनोज ग्यास उद्योगबाट उग्रचण्डी तथा मेट्रो एसटिसीका १ हजार ३७ सिलिन्डर पठाइएको छ। मकवानपुरको सहारा ग्यास उद्योगबाट एभरेष्ट र सुगमका ७ हजार ८७७ सिलिन्डर काठमाडौं पठाइएको छ।
चितवनको नेपाल ग्यास उद्योग गण्डकीबाट एपी, नेपाल र गीता उद्योगका ७ हजार ३४८, साइबाबा ग्यास उद्योगबाट श्रीकृष्ण र साइबाबाका ५ हजार ३३७ तथा बाबा ग्यास उद्योगबाट श्री ग्यासका ८ हजार ७१६ सिलिन्डर उपत्यका पठाइएको छ।
नवलपुरस्थित जानकी ग्यास उद्योगबाट श्रीराम र ओमका २ हजार ६४२ तथा नवलपरासीको चण्डेश्वरी ग्यास उद्योगबाट सागरका १ हजार ६८५ सिलिन्डर पनि काठमाडौं पठाइएको छ।
कृष्णभीरमा पहिरोका कारण ग्यास बोकेका बुलेटहरू काठमाडौं पुग्न नसकेपछि वैकल्पिक रूपमा विभिन्न जिल्लाका उद्योगबाट सिलिन्डर भरेर उपत्यका पठाउने व्यवस्था गरिएको हो।
Discussion about this post