काठमाडौं । नेपाल भलिबल लिग (एनभीएल) को पहिलो संस्करणको विजेता टोलीले २० लाख रुपैयाँ नगद पुरस्कार पाउने भएको छ। आयोजक केडिया ग्रुपले विजेताका लागि घोषणा गरेको यो पुरस्कार राशि नेपाली घरेलु भलिबल इतिहासकै सर्वाधिक भएको जनाएको छ।
केडिया ग्रुपका प्रबन्ध निर्देशक अश्विन केडियाका अनुसार प्रतियोगिताको कुल पुरस्कार राशि ३२ लाख रुपैयाँ रहेको छ। त्यसबाट १२ लाख रुपैयाँ उपविजेता, विभिन्न सात विधाका उत्कृष्ट खेलाडी तथा प्रत्येक खेलका ‘प्लेयर अफ द म्याच’लाई प्रदान गरिनेछ।
प्रतियोगिताको अन्तिम तयारीबारे जानकारी दिन आयोजित पत्रकार सम्मेलनमा एनभीएलको मस्कट, थिम सङ र प्रायोजकहरू सार्वजनिक गरिएको छ। प्रतियोगिताको मस्कट नेपालको राष्ट्रिय चरा डाँफेलाई बनाइएको छ। मस्कट रोनिश सुब्बाले डिजाइन गरेका हुन् भने थिम सङ अविन शाक्यले कम्पोज गरेका छन्।
एनभीएलका प्रमुख कार्यकारी अधिकृत डा. सन्तोष उपाध्यायले प्रतियोगितामार्फत बाढीपीडितलाई सहयोग गर्ने अभियानसमेत अघि बढाइने बताए। उनका अनुसार प्रतियोगिताको पहिलो दिन बिक्री हुने टिकटबाट प्राप्त सम्पूर्ण रकम प्रधानमन्त्री दैवी प्रकोप उद्धार कोषमा जम्मा गरिनेछ।
बाढीका कारण देश संकटमा रहेकाले प्रतियोगिताको उद्घाटन कार्यक्रमलाई सामान्य बनाइने उनले जानकारी दिए।
नेपाल भलिबल संघका अध्यक्ष जितेन्द्रबहादुर चन्दले बाढीपीडितको सहयोगमा केडिया ग्रुपले देखाएको अग्रसरताको प्रशंसा गरे। उनले नेपालको राष्ट्रिय खेल भलिबललाई व्यावसायिक रूपमा अघि बढाउन निजी क्षेत्रको भूमिका महत्त्वपूर्ण रहेको बताए।
शुक्रबारदेखि सुरु हुने एनभीएलमा ६ टोलीको सहभागिता रहनेछ। सहभागी टोलीले सिंगल राउन्ड रोबिन लिगका आधारमा एकअर्कासँग प्रतिस्पर्धा गर्नेछन्।
लिग चरणमा शीर्ष स्थानमा रहने टोली सोझै फाइनलमा पुग्नेछ। दोस्रो र तेस्रो स्थानमा रहने टोलीले फाइनल प्रवेशका लागि प्लेअफ खेल्नेछन्।
प्रतियोगिता भदौ २८ गतेसम्म त्रिपुरेश्वरस्थित राष्ट्रिय खेलकुद परिषद्को कभर्डहलमा सञ्चालन हुनेछ।
Discussion about this post