काठमाडौं । राष्ट्रिय स्वतन्त्र पार्टी (रास्वपा) का संसदीय दलका उपनेता गणेश पराजुलीले विपद्का बेला सरकारले स्रोत–साधन परिचालन गरेर मात्रै आफ्नो जिम्मेवारी पूरा भएको ठान्न नहुने बताएका छन्।
प्रतिनिधिसभाको आजको बैठकमा दलीय आधारमा बोल्दै पराजुलीले विपद् व्यवस्थापनका क्रममा राज्यबाट भएका प्रयासको सम्मान गर्दै तयारी र व्यवस्थापनमा देखिएका कमजोरीबाट पनि पाठ सिक्नुपर्ने बताए। उनले भएका कमजोरी लुकाउन नहुने र राज्यका प्रयासलाई पनि अवमूल्यन गर्न नहुने धारणा राखे।
उनका अनुसार विपद्का बेला राज्यले आफ्ना सबै संयन्त्र परिचालन गरिरहेको भए पनि उद्धार, राहत तथा पुनःस्थापनाका काम प्रभावकारी रूपमा अघि बढाउनुपर्ने आवश्यकता छ। सरकारले विपद्का समयमा गरिरहेका उद्धार तथा राहतका कामबारे नागरिकलाई स्पष्ट जानकारी दिनुपर्ने उनले बताए।
पराजुलीले जलवायु परिवर्तनका कारण नेपालजस्ता हिमाली मुलुकले पछिल्लो समय गम्भीर प्रकृतिका विपद् भोग्नुपरिरहेको उल्लेख गरे। नेपालले जलवायु संकटमा तुलनात्मक रूपमा न्यून योगदान गरे पनि त्यसको असर असमान रूपमा भोगिरहेको भन्दै उनले अन्तर्राष्ट्रिय समुदायसमक्ष जलवायु न्यायको विषयलाई प्राथमिकताका साथ उठाउनुपर्ने बताए।
‘नेपालले विश्वसँग केवल सहानुभूति मागेर हुँदैन,’ उनले भने, ‘जलवायु संकटमा हाम्रो भूमिका न्यून भए पनि हामीले असमान मूल्य चुकाइरहेका छौँ। त्यसैले अन्तर्राष्ट्रियस्तरमा जलवायु न्यायका लागि निरन्तर आवाज उठाउनुपर्छ।’
उनले विपद् र जलवायु जोखिमलाई ध्यानमा राख्दै विकासको नयाँ बहस आवश्यक रहेको पनि बताए।
बेपत्ता नागरिकको खोजी निरन्तर गर्नुपर्ने
उपनेता पराजुलीले बेपत्ता नागरिक फेला नपरेसम्म खोजी तथा उद्धार कार्य रोक्न नहुनेमा जोड दिए। विस्थापित नागरिक सुरक्षित रूपमा घर फर्कने अवस्था नबनेसम्म राहत वितरणलाई निरन्तरता दिनुपर्ने उनले बताए।
विपद् विनाशकारी हुनुको वास्तविक कारण पत्ता नलागेसम्म अनुसन्धान प्रक्रिया रोक्न नहुने भन्दै उनले घटनाको कारण र प्रभावबारे स्वतन्त्र, बहुविषयगत तथा वैज्ञानिक छानबिन आवश्यक रहेको बताए।
पराजुलीले भोटेकोशी–त्रिशूली नदी प्रणालीको समग्र जोखिम नक्साङ्कन तत्काल गर्नुपर्ने माग पनि गरे। यसबाट भविष्यमा हुन सक्ने सम्भावित विपद्को जोखिम पहिचान गरी पूर्वतयारी र न्यूनीकरणका योजना बनाउन सहयोग पुग्ने उनको भनाइ छ।
नेपाल अहिले शोकमा रहे पनि मुलुक बन्द नभएको सन्देश विश्व समुदायमा दिनुपर्ने उल्लेख गर्दै उनले सुरक्षित गन्तव्यहरूको आधिकारिक जानकारी लिएर नेपाल भ्रमणलाई निरन्तरता दिन आग्रह गरे।
कठिन परिस्थितिमा नेपालको पर्यटन क्षेत्रलाई जोगाउनु मुलुकको आर्थिक पुनरुत्थानका लागि महत्वपूर्ण हुने पराजुलीले बताए।
Discussion about this post