कपिलवस्तु । लुम्बिनी प्रदेशकी पूर्वसांसद तथा पूर्वअर्थ राज्यमन्त्री सुषमा यादवले नेपाली कम्युनिस्ट पार्टीबाट राजीनामा दिएकी छन्।
यादवले प्रदेश कमिटी सदस्य, मायादेवी गाउँपालिका इन्चार्जलगायत पार्टीका सबै जिम्मेवारीसँगै साधारण सदस्यसमेत नरहने गरी राजीनामा दिएको जानकारी दिएकी छन्।
राजीनामा पत्रमा यादवले आफू २०७४ सालदेखि पार्टीमा आबद्ध रही पार्टीको नीति, विचार, सिद्धान्त तथा संगठन निर्माणमा निरन्तर योगदान गर्दै आएको उल्लेख गरेकी छन्।
पछिल्लो समय पार्टीभित्र विकसित राजनीतिक परिस्थिति, कार्यशैली, निर्णय प्रक्रिया, संगठन सञ्चालन तथा कार्यकर्ताप्रतिको व्यवहारका केही पक्षप्रति असन्तुष्टि बढ्दै गएपछि पार्टीबाट अलग हुने निर्णयमा पुगेको उनले बताएकी छन्।
यादवले पार्टीभित्र आफूले अपेक्षा गरेको राजनीतिक संस्कार, पारदर्शिता, सामूहिक निर्णय, जिम्मेवारीबोध, न्यायपूर्ण व्यवहार तथा कार्यकर्ताप्रतिको सम्मान कमजोर हुँदै गएको अनुभूति भएको राजीनामा पत्रमा उल्लेख गरेकी छन्।
आफ्नो राजनीतिक मूल्य–मान्यता, निष्ठा र आत्मसम्मानसँग सम्झौता गरेर पदमा बसिरहनुभन्दा पार्टीबाट अलग हुनु उचित ठानेको यादवले बताएकी छन्।
पार्टीबाट अलग भए पनि जनताको सुख–दुःख, अधिकार, न्याय तथा सामाजिक हितका विषयमा आगामी दिनमा समेत आफ्नो क्षमता र विवेकअनुसार आवाज उठाइरहने उनले स्पष्ट पारेकी छन्।
यादवले भनेकी छन्, ‘पद छोड्दैमा जनताप्रतिको जिम्मेवारी समाप्त हुँदैन र पार्टी छोड्दैमा जनतासँगको सम्बन्ध टुट्दैन।’
Discussion about this post