काठमाडौं । प्राकृतिक विपद्का कारण लगानीकर्तामा बढेको चिन्ताको प्रभाव नेपाली सेयर बजारमा देखिएको छ। साताको पहिलो कारोबार दिन सोमबार नेप्से परिसूचक ४३.८९ अंकले घटेर २ हजार ५१३.४२ विन्दुमा झरेको छ।
रसुवामा आएको भीषण बाढीका कारण जलविद्युत् आयोजनाका संरचनामा क्षति पुगेपछि विशेषगरी जलविद्युत् कम्पनीप्रति लगानीकर्ताको चिन्ता बढेको देखिएको छ। बाढीका कारण रसुवा र नुवाकोटका विभिन्न जलविद्युत् आयोजनामा क्षति पुगेको विवरण सार्वजनिक भएपछि बजारमा नकारात्मक प्रभाव परेको हो।
सोमबार ३४७ वटा स्क्रिप्स कारोबारमा आएका थिए। कुल ९३ लाख २२ हजार १८५ कित्ता सेयर ३ अर्ब ६४ करोड ८६ लाख रुपैयाँभन्दा बढीमा किनबेच भए।
कारोबार भएका कम्पनीमध्ये कुनै पनि कम्पनीको सेयर मूल्य सकारात्मक सर्किट लेभलमा पुग्न सकेन। उपकार लघुवित्त वित्तीय संस्थाको सेयर मूल्य सर्वाधिक १३.१६ प्रतिशतले बढेको छ भने मैलुङ खोला जलविद्युत् कम्पनीको सेयर मूल्य १४.९८ प्रतिशतले घटेको छ।
कारोबार रकमका आधारमा शिवम् सिमेन्ट शीर्ष स्थानमा रह्यो। कम्पनीको करिब २६ करोड रुपैयाँ बराबरको सेयर कारोबार भएको छ। त्यस्तै, सर्वोत्तम पेन्ट्स इन्डस्ट्रिजको १५ करोड, रिलायन्स स्पिनिङ मिल्स र चिलिमे हाइड्रोपावरको १२/१२ करोड तथा एसवाई प्यानल नेपालको ११ करोड रुपैयाँ बराबरको कारोबार भएको छ।
सोमबार कारोबार भएका कम्पनीमध्ये २१ वटा स्टकको मूल्य बढ्दा २५३ वटाको घटेको छ भने ४ वटा स्टकको मूल्य स्थिर रह्यो।
मनु एन्ड प्रो समूहको उपसूचकबाहेक अन्य सबै समूहका उपसूचक नकारात्मक देखिएका छन्। प्राकृतिक विपद्का कारण जलविद्युत् क्षेत्रमा देखिएको जोखिम र लगानीकर्ताको मनोवैज्ञानिक दबाबले समग्र बजारमा बिक्री चाप बढेको देखिन्छ।
Discussion about this post