काठमाडौं । भारतका रक्षामन्त्री राजनाथ सिंहले भोटेकोशी बाढीबाट नेपालमा भएको जनधनको क्षतिप्रति दुःख व्यक्त गर्दै नयाँ दिल्लीस्थित नेपाली दूतावास पुगेर समवेदना प्रकट गरेका छन्।
दूतावास पुगेका सिंहले शोक पुस्तिकामा हस्ताक्षर गर्दै बाढीमा ज्यान गुमाउनेहरूप्रति श्रद्धाञ्जली अर्पण गरेका छन्। उनले शोकसन्तप्त परिवारप्रति भारत सरकार र भारतीय जनताको तर्फबाट गहिरो समवेदना व्यक्त गरे।
सिंहले अगस्ट २६, २०२६ मा आएको बाढीबाट भएको ठूलो मानवीय क्षति र विनाशप्रति नेपालका जनता तथा सरकारसँग दुःख व्यक्त गरेका हुन्। बाढीबाट नेपाली नागरिकसँगै भारतीय तथा अन्य विदेशी नागरिकसमेत प्रभावित भएको उनले उल्लेख गरे।
उनले विपद्मा ज्यान गुमाउनेका परिवारप्रति भारतको साथ र सहयोग निरन्तर रहने बताउँदै घाइतेहरूको शीघ्र स्वास्थ्यलाभको कामना गरे।
नेपाल र भारतबीचको घनिष्ठ सम्बन्धलाई स्मरण गर्दै सिंहले भारतले नेपाललाई सुख–दुःखको साथीका रूपमा सधैं साथ दिँदै आएको बताए। कठिन परिस्थितिमा पनि भारत नेपाली नागरिकसँगै उभिएको उल्लेख गर्दै उनले खोज, उद्धार तथा पुनर्स्थापनाका लागि नेपालले गरिरहेको प्रयासमा सहयोग गर्न भारत प्रतिबद्ध रहेको स्पष्ट पारे।
Discussion about this post