काठमाडौं । अमेरिकाले विनाशकारी बाढीबाट प्रभावित नेपालका नागरिकका लागि ३६ लाख अमेरिकी डलरभन्दा बढीको जीवनरक्षक मानवीय सहायता उपलब्ध गराउने घोषणा गरेको छ।
अमेरिकी विदेश मन्त्रालयले सामाजिक सञ्जाल ‘एक्स’मार्फत सहायता घोषणा गर्दै विपद्को कठिन समयमा अमेरिका नेपाली जनताको साथमा रहेको जनाएको छ।
अमेरिकी सहयोगअन्तर्गत बाढीबाट प्रभावित १० हजारसम्म घरपरिवारलाई तीन महिनासम्म आपत्कालीन खाद्यान्न सहायता उपलब्ध गराइनेछ। तत्काल खाद्यान्न आवश्यक रहेका प्रभावित परिवारलाई राहत पुर्याउने उद्देश्यले उक्त सहयोग परिचालन गरिने जनाइएको छ।
अमेरिकी विदेश मन्त्रालयले नेपालमा रहेका आफ्ना नागरिकको सुरक्षालाई समेत उच्च प्राथमिकतामा राखेको जनाएको छ। नेपाल तथा चीनमा रहेका अमेरिकी दूतावास र सम्बन्धित निकायले प्रभावित क्षेत्रमा रहेका अमेरिकी नागरिकको अवस्थाबारे जानकारी लिने तथा आवश्यक सहयोग र विपद् प्रतिकार्यका लागि समन्वय गरिरहेको जनाइएको छ।
यसअघि अमेरिकाले नेपालका बाढी प्रभावित समुदायका लागि ५ लाख अमेरिकी डलर बराबरको प्रारम्भिक मानवीय सहायता घोषणा गरेको थियो। उक्त रकम आपत्कालीन आश्रय, राहत सामग्री तथा खानेपानी, सरसफाइ र स्वच्छतासम्बन्धी अत्यावश्यक सेवामा प्रयोग गर्ने गरी उपलब्ध गराइएको थियो।
भोटेकोशी क्षेत्रमा आएको विनाशकारी बाढीपछि नेपालका विभिन्न क्षेत्रमा ठूलो जनधनको क्षति भएको छ। बाढी र पहिरोबाट प्रभावित क्षेत्रमा खोज तथा उद्धार कार्य जारी रहे पनि ठूलो संख्यामा मानिस अझै सम्पर्कविहीन रहेको जनाइएको छ।
सरकारले प्रभावित नागरिकको खोजी, उद्धार, राहत तथा पुनःस्थापनालाई प्राथमिकतामा राखेको जनाएको छ। विपद्पछि प्रभावित समुदायमा खाद्यान्न, सुरक्षित आश्रय, खानेपानी तथा स्वास्थ्य सेवाको आवश्यकता बढ्दै गएको छ।
यसैबीच, अमेरिकासहित विभिन्न मित्रराष्ट्र तथा अन्तर्राष्ट्रिय संस्थाले नेपालका बाढी प्रभावित क्षेत्रमा मानवीय सहायता बढाउँदै लगेका छन्। संयुक्त राष्ट्रसंघीय विश्व खाद्य कार्यक्रम (डब्लुएफपी) ले समेत प्रभावित समुदायका लागि प्रारम्भिक खाद्यान्न सहायता तथा राहत व्यवस्थापनमा सहयोग गरिरहेको जनाएको छ।
अमेरिकाबाट घोषणा गरिएको पछिल्लो सहयोगले बाढीबाट प्रभावित हजारौँ परिवारलाई तत्काल आवश्यक खाद्यान्न तथा अन्य मानवीय सहायता उपलब्ध गराउन थप सहयोग पुग्ने अपेक्षा गरिएको छ।
Discussion about this post