कञ्चनपुर । भौगोलिक रूपमा कमजोर पहाडी भूभागका कारण हरेक वर्ष पहिरो, बाढी, सडक अवरोध र आगलागी जस्ता बहु-प्रकोपीय विपद्को उच्च जोखिम खेप्दै आएको चुरे गाउँपालिकामा खोज तथा उद्धार सामग्रीहरू हस्तान्तरण गरिएको छ। गाउँपालिकाको स्थानीय आपतकालीन कार्य सञ्चालन केन्द्रको कार्यक्षमता सुदृढ गर्न यो सहयोग उपलब्ध गराइएको हो। नेपाल राष्ट्रिय समाज कल्याण संघ (एनएनएसडब्ल्यूए) र मर्सिकोर नेपालको साझेदारी तथा द कोका-कोला फाउण्डेशनको आर्थिक सहयोगमा सञ्चालित ‘नेपालमा पूर्वानुमानमा आधारित पूर्वकार्यको सुदृढिकरण (सान)’ परियोजनाले उक्त सामग्रीहरू हस्तान्तरण गरेको हो।
केन्द्रलाई लाइफ ज्याकेट, नाइलनको डोरी, थ्रो ब्याग, हेल्मेट, वर्किङ ग्लोब्स, रबर बुट, अग्निनियन्त्रक यन्त्र (फायर एक्स्टिंग्विसर), गैँती, रेनकोट, सोभेल, स्ट्रेचर, त्रिपाल, टर्च लाइट र छाता लगायतका खोज तथा उद्धार सामग्रीहरू हस्तान्तरण गरिएको हो। ‘सान’ परियोजनाले यसअघि सूचना व्यवस्थापनका लागि कम्प्युटर, डिजिटल डिस्प्ले बोर्ड, स्मार्ट बोर्ड र फर्निचर जस्ता प्राविधिक उपकरणहरू समेत सहयोग गरिसकेको छ। साथै, केन्द्रको सहजीकरणका लागि एक जना प्राविधिक जनशक्ति समेत उपलब्ध गराइएको छ।
सामग्री हस्तान्तरणका क्रममा सान परियोजनाका कार्यक्रम संयोजक देवराज बडुले सम्भाव्य विपद्लाई ध्यानमा राखेर गाउँपालिकाको माग अनुसार नै यी सामग्रीहरू तत्काल परिचालन गर्ने गरि हस्तान्तरण गरिएको जानकारी दिनुभयो। उहाँले स्थानीय आपतकालीन कार्य सञ्चालन केन्द्रसँग पहिले नै प्राविधिक डाटा र सञ्चारको पहुँच भइसकेको अवस्थामा, अब यी उद्धार सामग्रीहरूले कार्यक्षेत्रमा खटिने सामुदायिक प्रतिकार्य टोलीलाई तत्काल उद्धार कार्य सुरु गर्न र पूर्वसूचना प्रणालीलाई तल्लो तहसम्म प्रभावकारी रूपमा प्रवाह गरि पूर्वकार्य गर्नमा मद्दत पुग्ने भनाई राख्नुभयो।
गाउँपालिकाका अध्यक्ष चक्र बहादुर बोगटीले चुरे क्षेत्र प्राकृतिक रूपमा अत्यन्तै संवेदनशील र बहु-प्रकोपीय जोखिममा रहेको चर्चा गर्दै मनसुन सुरु हुनै लाग्दा प्राप्त भएका यी खोज तथा उद्धार सामग्रीहरू पालिकाका लागि निकै महत्त्वपूर्ण रहेको बताउनुभयो। उहाँले विगतमा पूर्वतयारीका साधन र पर्याप्त तथ्यांकको अभावले गर्दा मनसुनको समयमा तत्काल राहत र उद्धारमा नीतिगत निर्णय लिन निकै सकस हुने गरेको स्मरण गर्नुभयो। अध्यक्ष बोगटीले अब प्राप्त भएका यी सामग्रीहरूको उच्चतम् सदुपयोग गर्दै पालिकाले यस वर्षको मनसुनमा जनधनको क्षति न्यूनीकरण गर्न र द्रुत प्रतिकार्य संयन्त्रलाई थप सबल बनाउन विशेष केन्द्रित हुने प्रतिबद्धता व्यक्त गर्नुभयो।
त्यसैगरी गाउँपालिकाका प्रमुख प्रशासकीय अधिकृत धर्मराज खत्रीले मनसुनको पूर्वसन्ध्यामा प्राप्त भएका यी सामग्रीहरूले गाउँपालिकाको विपद् व्यवस्थापन र आकस्मिक उद्धार टोलीको कार्यक्षमतामा गुणात्मक वृद्धि गर्ने उल्लेख गर्नुभयो। उहाँले स्थानीय आपतकालीन कार्य सञ्चालन केन्द्रलाई चौबीसै घण्टा सजग र तयारी अवस्थामा राख्न तथा कुनै पनि विपद्को घटना हुनासाथ तत्काल घटनास्थलमा स्रोत-साधन सहित टोली परिचालन गर्न यो सहयोग कोशेढुङ्गा साबित हुने धारणा राख्नुभयो। प्रमुख प्रशासकीय अधिकृत खत्रीले पालिकाको भौगोलिक विकटतालाई चिर्दै स्थानीय स्तरमै जोखिमको आँकलन र सुरक्षित व्यवस्थापनका लागि प्रशासनिक र प्राविधिक दुवै रूपमा संयन्त्रलाई पूर्ण रूपमा सक्रिय बनाइने बताउनुभयो।
स्थानीय सरकार र दातृ निकायको यो संयुक्त प्रयासले चुरे क्षेत्रका बासिन्दामा विपद्को समयमा हुन सक्ने जनधनको क्षति कम हुने आशा जगाएको छ। पूर्वानुमान र पूर्वतयारीलाई प्राथमिकता दिँदै उपलब्ध गराइएका यी सामग्री तथा प्राविधिक उपकरणहरूले आगामी दिनमा पालिकाको विपद् व्यवस्थापन प्रणालीलाई थप सवल, छिटो र प्रभावकारी बनाउने विश्वास गरिएको छ।
Discussion about this post