फुटबलको इतिहासमै पहिलो पटक तीन देश अमेरिका, मेक्सिको र क्यानडाको संयुक्त आयोजनामा हुने फिफा विश्वकप २०२६ आज मध्यरातिदेखि सुरु हुँदैछ।
विश्व फुटबलको महाकुम्भको पहिलो दिन दुई खेल हुनेछन्। उद्घाटन खेलमा आयोजक मेक्सिकोले दक्षिण अफ्रिकासँग प्रतिस्पर्धा गर्नेछ भने दोस्रो खेलमा दक्षिण कोरिया र चेक गणतन्त्र आमनेसामने हुनेछन्। यससँगै ४८ राष्ट्र सहभागी विश्वकपको औपचारिक सुरुवात हुनेछ।
यस पटकको विश्वकप इतिहासकै सबैभन्दा ठूलो संस्करणका रूपमा आयोजना हुँदैछ। तीन देशका १६ शहरमा हुने प्रतियोगिता ३९ दिनसम्म चल्नेछ भने कुल १०४ खेल खेलाइनेछन्। फिफाका अनुसार प्रतियोगिताका लागि १ हजार २४८ खेलाडी छनोट भएका छन्। तीमध्ये ८९१ खेलाडी पहिलो पटक विश्वकप खेल्दैछन् भने ३५७ खेलाडी यसअघि पनि विश्वकप खेलिसकेका छन्।
यस संस्करणमा केप भर्डे, कुरासाओ, जोर्डन र उज्बेकिस्तानले पहिलो पटक विश्वकपमा स्थान बनाएका छन्।
उद्घाटन खेलअघि भव्य उद्घाटन समारोह आयोजना गरिनेछ। समारोहमा शाकिरा, बर्ना ब्वाय, जे बल्भिन, टाइला, आलेहान्द्रो फर्नान्डेज, बेलिन्डा र मानालगायत चर्चित कलाकारको प्रस्तुति रहनेछ।
मेक्सिकोमा पहिलो उद्घाटन समारोहपछि क्यानडाको टोरन्टोमा दोस्रो उद्घाटन समारोह हुनेछ भने अमेरिकाको लस एन्जलसमा तेस्रो उद्घाटन समारोह आयोजना गरिनेछ।
प्रतियोगिताका खेलहरू अमेरिकाका ११, मेक्सिकोका ३ र क्यानडाका २ शहरमा खेलाइनेछन्। अधिकांश खेल अमेरिकामा हुनेछन् भने फाइनल खेल न्युयोर्कस्थित मेटलाइफ स्टेडियममा हुनेछ।
मेसी, रोनाल्डो र एम्बाप्पेजस्ता स्टार खेलाडीसँगै नयाँ पुस्ताका प्रतिभाशाली खेलाडीबीचको प्रतिस्पर्धाले विश्वकप २०२६ लाई थप रोमाञ्चक र ऐतिहासिक बनाउने अपेक्षा गरिएको छ।
Discussion about this post