लुम्बिनी युवा मञ्चको अध्यक्षमा पहिलो पटक तेस्रोलिंगी प्रतिनिधि वर्षा ठकुरी निर्वाचित

लुम्बिनी प्रदेशको भालुवाङमा सम्पन्न १२ जिल्लाका युवाहरूको प्रदेशस्तरीय सम्मेलनबाट लुम्बिनी प्रदेश नागरिक समाज युवा सञ्जालको अध्यक्षमा तेस्रोलिंगी प्रतिनिधि वर्षा ठकुरी निर्वाचित भएकी छन्।

निर्वाचनमा प्रतिस्पर्धामा रहेका अन्य पुरुष तथा महिला उम्मेदवारलाई पछि पार्दै ठकुरी ३ मतको अन्तरले विजयी भएकी हुन्। उनले आफ्नो जितलाई व्यक्तिगत सफलताभन्दा पनि समावेशी समाज निर्माणतर्फको साझा उपलब्धि भएको बताएकी छन्।

लुम्बिनी प्रदेशका १२ वटै जिल्लाका युवाहरूको सहभागितामा सम्पन्न सम्मेलनले १३ सदस्यीय नयाँ कार्यसमिति चयन गरेको हो। समितिको सह–अध्यक्षमा आस्था बि.क. र सदस्यसचिवमा प्रियङ्का गिरी निर्वाचित भएका छन्।

त्यसैगरी सदस्यहरूमा समीक्षा पुन मगर, रुद्रमणि भुसाल, कविता बुढा, विष्णु बि.क., रवि बि.क., अमृत बि.क., आशिष शक्तिराज, रेजिना मिया, रमेश बड र समीक्षा बि.क. चयन भएका छन्।

समावेशी प्रतिनिधित्व र लैङ्गिक समानताको अभ्यासस्वरूप भएको यस निर्वाचनलाई यौनिक तथा लैङ्गिक अल्पसंख्यक (LGBTIQA+) समुदायले ऐतिहासिक उपलब्धिका रूपमा लिएका छन्।

सम्बन्धित संस्थाहरूले यस सफलताले समाजमा सीमान्तकृत समुदायको अर्थपूर्ण सहभागिता र नेतृत्व विकासलाई थप मजबुत बनाउने विश्वास व्यक्त गरेका छन्।