काठमाडौं : लैङ्गिक तथा यौनिक अल्पसङ्ख्यक समुदायको राजनीतिक सशक्तिकरण र अधिकार सुनिश्चितताका लागि ‘मिसन ८४’ केन्द्रित राजनीतिक साक्षरता अभियान सुरु गरिएको छ।
युरोपियन युनियनको सहयोग तथा एक्सन एड नेपालसँगको सहकार्यमा मायाको पहिचान नेपाल, समावेशी मञ्च नेपाल (इन्क्लुसिभ फोरम) र लिड नेपालले संयुक्त रूपमा अभियान सञ्चालन गरेका हुन्। अभियानअन्तर्गत देशभरबाट ५० जना राजनीतिक अभियन्ता परिचालन गरिएको छ।
आयोजक संस्थाहरूका अनुसार समुदायलाई राजनीतिक मूलधारमा ल्याउने, नेतृत्व विकास गर्ने र २०८४ सालको प्रदेश तथा स्थानीय तह निर्वाचनलाई लक्षित गर्दै उम्मेदवारी तयारी गराउने उद्देश्यले अभियान सञ्चालन गरिएको हो।
अभियानले नागरिकता, समान विवाह अधिकार, सम्पत्ति तथा उत्तराधिकार, रोजगारीमा आरक्षण, राजनीतिक प्रतिनिधित्व, स्वास्थ्य सेवा र समावेशी कानुनी व्यवस्थाजस्ता विषयलाई मुख्य एजेन्डा बनाएको छ।
सहभागी अभियन्ताहरूले अझै पनि समुदाय सामाजिक विभेद, अस्वीकृति र अपमानको सामना गरिरहेको भन्दै राजनीतिक सहभागिता नै समाधानको बाटो भएको बताएका छन्।
उनीहरूले वडा तहदेखि सङ्घीय संसद्सम्म प्रतिनिधित्व सुनिश्चित गर्नुपर्ने माग राख्दै अभियानलाई निरन्तर अघि बढाइने बताएका छन्।
Discussion about this post