कञ्चनपुर । कञ्चनपुरको सार्क एजुकेशन फाउण्डेशनले शिक्षा प्रणालीमा व्यापक सुधार र नवीनतम शिक्षण कार्यक्रम कार्यान्वयन गर्ने उद्देश्यले पत्रकारहरूसँग अन्तरक्रिया एवम् पत्रकार सम्मेलन आयोजना गरेको छ। फाउण्डेशनले परम्परागत शिक्षाको विकल्पमा विश्वस्तरीय र व्यवहारिक अभ्यासमा आधारित नयाँ शैक्षिक प्रणाली लागू गर्न लागेको जानकारी दिएको हो।
फाउण्डेशनका सिइओ डा. लक्ष्मण बस्नेतले संस्थाले यसै शैक्षिक सत्रदेखि लागू गर्न लागेको नयाँ शैक्षिक प्रणालीबारे विस्तृत जानकारी गराउनुभयो। उहाँले अबको शिक्षालाई केवल सैद्धान्तिक मात्र नबनाई विषयगत रूपमा ल्याब–आधारित बनाइने बताउनुभयो। बस्नेतका अनुसार फाउण्डेशनले STREAME (Science, Technology, Reading, Engineering, Arts, Mathematics & Entrepreneurship) आधारित कार्यक्रम अघि सारेको छ। यस अन्तर्गत कक्षा १ देखि ३ सम्म ५० प्रतिशत र कक्षा ३ देखि १० सम्म पूर्ण रूपमा ल्याब–आधारित शिक्षण प्रणाली अपनाइने योजना रहेको उहाँले प्रष्ट पार्नुभयो।
फाउण्डेशनका विज्ञान संकाय प्रमुख राजेश भण्डारीले कक्षा १२ सम्म सञ्चालन भइरहेका शैक्षिक गतिविधि र विद्यार्थीको व्यवहारिक ज्ञान अभिवृद्धिमा केन्द्रित कार्यक्रमहरूबारे प्रकाश पार्नुभयो। उहाँले विद्यार्थीले किताबमा पढेका कुरालाई व्यवहारमै उतार्न सक्ने वातावरण निर्माणमा फाउण्डेशन लागिपरेको बताउनुभयो।
त्यस्तै, प्रिन्सिपल सूर्य घिमिरेले वर्तमान शिक्षा प्रणालीलाई व्यवहारिक अभ्यासमा आधारित बनाउँदै विश्वस्तरीय शिक्षा लागू गर्नु समयको माग भएको र सार्कले त्यसको नेतृत्व गर्ने धारणा व्यक्त गर्नुभयो।
Discussion about this post