महेन्द्रनगर, नेपाल निजामती कर्मचारी संगठन सुदूरपश्चिम प्रदेश समितिले सोमबार प्रदेशभर विभिन्न कार्यक्रमको आयोजना गर्दै आफ्नो स्थापना दिवस मनाइरहेको छ।
संगठनले हरेक वर्ष स्थापना दिवसलाई विशेष कार्यक्रमका साथ मनाउँदै आएको छ। विगत वर्षहरूझैं यस वर्ष पनि सुदूरपश्चिम प्रदेशका सबै जिल्लामा एकैसाथ स्थापना दिवस मनाउने कार्यक्रम तय गरिएको प्रदेश अध्यक्ष महादेब जोशी ले जानकारी दिएका छन्।
उनका अनुसार संगठनको केन्द्रीय कार्यक्रमअनुसार प्रदेशभर स्थापना दिवस मनाउने तयारी गरिएको हो। स्थापना दिवसका अवसरमा आयोजना गरिने कार्यक्रमहरूमा प्रदेश अध्यक्ष जोशीसहित संगठनका विभिन्न तहका पदाधिकारी, सदस्य तथा सरोकारवाला व्यक्तिहरूको सहभागिता रहने जनाइएको छ।
यसैबीच स्थापना दिवसको पूर्वसन्ध्यामा आइतबार कञ्चनपुरको बेदकोट नगरपालिका–८ रौटेलास्थित बैजनाथ धाम वृद्धाश्रम मा खाद्यान्न तथा अन्य आवश्यक सामग्री सहयोग गरिएको छ। सामाजिक उत्तरदायित्वअन्तर्गत आयोजना गरिएको उक्त कार्यक्रममा वृद्धाश्रममा आश्रित ज्येष्ठ नागरिकहरूलाई दैनिक उपभोग्य सामग्री वितरण गरिएको संगठनले जनाएको छ।
कार्यक्रममा संगठनका केन्द्रीय सदस्य प्रताप चन्द, जिल्ला अध्यक्ष मान बहादुर चन्द, सचिव दिनेशराज भट्ट, राष्ट्र सेवक बचत तथा ऋण सहकारीका अध्यक्ष गंगादत्त जोशी लगायत पदाधिकारी तथा सदस्यहरूको उपस्थिति रहेको थियो।
Discussion about this post