काठमाडौँ – संघीय संसद् सचिवालयले आज प्रतिनिधिसभामा प्रतिनिधित्व गर्ने दलहरूको सर्वदलीय बैठक आह्वान गरेको छ। सरकारको सिफारिसमा रामचन्द्र पौडेलले भोलि संघीय संसद् अधिवेशन आह्वान गरेपछि त्यसको तयारीस्वरूप बैठक बोलाइएको हो। सचिवालयका प्रवक्ता एकराम गिरीका अनुसार बैठक दिउँसो १ बजे सिंहदरबारस्थित सचिवालयमा बस्नेछ।
गएको फागुन २१ मा सम्पन्न प्रतिनिधिसभा सदस्य निर्वाचनबाट निर्वाचित सांसदहरूको पहिलो अधिवेशन भोलि दिउँसो २ बजे सुरु हुनेछ। प्रतिनिधिसभामा राष्ट्रिय स्वतन्त्र पार्टी, नेपाली कांग्रेस, नेकपा एमाले, नेपाल कम्युनिष्ट पार्टी, श्रम संस्कृति पार्टी र राष्ट्रिय प्रजातन्त्र पार्टीको प्रतिनिधित्व रहेको छ भने स्वतन्त्र सांसदका रूपमा महावीर पुन रहनुभएको छ।
प्रतिनिधिसभाको पहिलो बैठकमा सुशीला कार्की नेतृत्वको तत्कालीन सरकारले जारी गरेका तीन अध्यादेश पेश गर्ने सम्भावित कार्यसूची रहेको सचिवालयले जनाएको छ। आजको सर्वदलीय बैठकमा भोलिको एजेण्डा, बैठक सञ्चालन, कार्यतालिका व्यवस्थापनलगायत विषयमा छलफल हुनेछ। साथै सभामुख र उपसभामुखको निर्वाचन प्रक्रिया सुरु गर्ने विषय पनि प्राथमिकतामा रहनेछ। संवैधानिक व्यवस्थाअनुसार पहिलो बैठक बसेको १५ दिनभित्र सभामुख र उपसभामुखको निर्वाचन सम्पन्न गर्नुपर्ने हुन्छ।
यसैबीच, संसद् सञ्चालनका लागि सिंहदरबार संसद भवनभित्र निर्माणाधीन बहुउद्देश्यीय हल पूर्ण नभएकाले आवश्यक व्यवस्थापन मिलाउने प्रयास भइरहेको प्रवक्ता गिरीले जानकारी दिनुभयो।
Discussion about this post