काठमाडौँ – सरकारले संविधान संशोधनको तयारी सुरु गरेको छ। यसका लागि संविधान संशोधनसम्बन्धी बहसपत्र तयार गर्न कार्यदल गठन गर्ने निर्णय गरिएको छ।
सोमबार प्रधानमन्त्री तथा मन्त्रिपरिषद्को कार्यालयमा प्रधानमन्त्री बालेन्द्र शाहको अध्यक्षतामा बसेको मन्त्रिपरिषद् बैठकले संसद्मा प्रतिनिधित्व गर्ने सबै राजनीतिक दलको सहभागिता रहने गरी कार्यदल गठन गर्ने निर्णय गरेको हो। बैठकपछि सरकारका प्रवक्ता तथा शिक्षा, विज्ञान तथा प्रविधिमन्त्री सस्मित पोखरेलले संविधान संशोधन बहसपत्र तयार गर्न प्रधानमन्त्रीका राजनीतिक सल्लाहकारको अध्यक्षतामा कार्यदल गठन गरिने जानकारी दिनुभयो। उहाँका अनुसार राष्ट्रिय सहमतिमा आधारित भएर बहसपत्र तयार गरिनेछ।
उच्च प्रोफाइल व्यक्तिहरूको पक्राउबारे सञ्चारकर्मीको जिज्ञासामा प्रवक्ता पोखरेलले सरकारले कानुनी प्रक्रियाअनुसार काम गरिरहेको स्पष्ट पार्नुभयो। “सरकार यस विषयमा संवेदनशील छ, सबै प्रक्रिया कानुनअनुसार भइरहेको छ,” उहाँले भन्नुभयो। भदौ २३ र २४ गतेको घटनाबारे उहाँले कार्की आयोगको प्रतिवेदन कार्यान्वयन गरिएको मात्र बताउँदै अनुसन्धान तथा अदालती प्रक्रियामा कुनै हस्तक्षेप नहुने स्पष्ट पार्नुभयो।
त्यस्तै, मन्त्रिपरिषद् बैठकमा सहकारी पीडितहरूको विषयमा पनि छलफल भएको छ। एक लाख रुपैयाँभन्दा कम बचत भएका बचतकर्तालाई प्राथमिकतामा राखेर भुक्तानी गर्ने विषयमा छलफल भएको र सरकार सहकारी पीडितप्रति संवेदनशील रहेको प्रवक्ता पोखरेलले जानकारी दिनुभयो।
Discussion about this post