काठमाडौँ – एमाले महासचिव शङ्कर पोखरेलले भदौ २३ र २४ गतेको आन्दोलनसम्बन्धी छानबिनका लागि गठन गरिएको गौरीबहादुर कार्की आयोग निष्पक्ष उद्देश्यका लागि नबनेको दाबी गरेका छन्। आयोगको प्रतिवेदन सार्वजनिक भएसँगै उठिरहेका प्रश्नबीच पोखरेलले उक्त प्रतिवेदन स्वयंले नै निष्पक्षता नदेखाएको पुष्टि गरेको टिप्पणी गरेका हुन्।
बिहीबार सामाजिक सञ्जालमार्फत धारणा सार्वजनिक गर्दै उनले कार्की आयोगको गठन र आम निर्वाचन ०८२ दुवै प्रक्रियामा ‘अल्गोरिदममार्फत’ नेपाली समाजमा परेको प्रभावलाई राजनीतिक र कानुनी वैधानिकता दिने प्रयास भएको उल्लेख गरेका छन्। “कार्की आयोग निष्पक्ष छानबिनका लागि बनेको होइन भन्ने धारणा आयोगको प्रतिवेदनले नै पुष्टि गरेको छ,” उनले लेखेका छन्।
पोखरेलले निर्वाचनको परिणाम र आयोगको प्रतिवेदन एकअर्कासँग जोडिएको संकेत गर्दै नेपाली राजनीति नयाँ मोडतर्फ अघि बढेको टिप्पणी गरेका छन्। उनले ‘अल्गोरिदम’ को प्रयोगबाट लोकप्रियतावाद, अराजकतावाद र अवसरवादको मिश्रणबाट नयाँ शक्तिको उदय भएको दाबी गरे। उनका अनुसार अबको राजनीतिक यात्रा सहज नहुने संकेत देखिएको छ र राष्ट्र तथा लोकतन्त्र दुवैले केही समय चुनौतीको सामना गर्नुपर्ने अवस्था आएको छ। साथै, उनले नयाँ शक्तिलाई आफ्ना दृष्टिकोणअनुसार काम गर्ने अवसर दिनुपर्ने र जनताले प्रत्यक्ष अनुभवमार्फत मूल्याङ्कन गर्न पाउनुपर्ने धारणा व्यक्त गरेका छन्।
तर, उनले लोकप्रियतावाद, अराजकतावाद र अवसरवाद दीर्घकालीन समाधान नभएको भन्दै विचारधारात्मक राजनीतिको विकल्पका रूपमा यस्ता प्रवृत्ति स्वीकार्य नहुने स्पष्ट पारेका छन्।
Discussion about this post