काठमाडौँ: गैरआवासीय नेपाली संघ (एनआरएनए) का संस्थापक अध्यक्ष उपेन्द्र महतोले आगामी १० वर्षमा नेपालको अर्थतन्त्र १०० बिलियन डलरको बनाउन सकिने बताएका छन्।
काठमाडौँमा शनिबार गैरआवासीय नेपाली संघको १२ औँ महाधिवेशनको उद्घाटन सत्रमा महतोले नेपालभित्र र बाहिर रहेका नेपालीहरूको आर्थिक गतिविधिलाई जोड्दा अर्थतन्त्र अहिले नै करिब १०० बिलियन डलर पुग्न लागिसकेको बताए। उनले हाल ८० लाख नेपाली बाहिर रहेको र वार्षिक करिब २० अर्ब डलर रेमिट्यान्स नेपाल भित्रिने गरेको उनले बताए।
उनले देश बनाउने संकल्प भए छोटो समयमै नेपाललाई आर्थिक रूपमा समृद्ध बनाउन सकिने बताए। उनले नेपाललाई समृद्ध बनाउन गैरआवासीय नेपालीहरूको लगानी महत्त्वपूर्ण हुने पनि बताए। सरकारसँग गुनासो मात्रै गर्ने प्रवृत्ति त्यागेर देश निर्माणमा सक्रिय भूमिका खेल्न उनले गैरआवसीय नेपालीलाई आह्वान गरे।
उनले गैरआवसीय नेपालीलाई विदेशमा बसेर सरकार र नेपालीलाई देश बनाउने सुझाव मात्रै नदिन आग्रह गरे। देश बनाउने दायित्व सबैको भएको भन्दै उनले नेपालमा आएर योगदान गर्न आह्वान गरे।
‘म गैरआवसीय नेपाली मित्रहरुलाई भन्न चाहन्छु, हामी सरकारसँग गुनासो मात्रै गर्छौँ, सबै राम्रो भएको भए तपाईँ हाम्रो के आवश्यकता पर्ने थियो र१’, उनले भने, ‘जुन वेलामा देश अफ्ठ्यारोमा छ। नियम कानून अफ्ठ्यारा छन्, त्यस्ता वेला तपाईँ हामी आएर नेपाल बनाउने अभियान अगाडि बढाउनुपर्छ।’
Discussion about this post