कञ्चनपुर । कञ्चनपुरस्थित सार्क एजुकेसन फाउन्डेसनका कक्षा ११ विज्ञान सङ्कायका विद्यार्थीहरू भारतको देहरादूनमा आयोजना हुने दुई दिने उच्च स्तरीय विज्ञान सेमिनारमा सहभागी हुने भएका छन्।
फेब्रुअरी २७ र २८ तारिखमा सञ्चालन हुने उक्त सेमिनारमा सहभागी हुन फाउन्डेसनका कार्यकारी निर्देशक डा. लक्ष्मण बस्नेतको नेतृत्वमा विद्यार्थीहरूको टोली त्यसतर्फ प्रस्थान गर्ने तयारीमा छ। उत्तराखण्ड स्टेट काउन्सिल फर साइन्स एण्ड टेक्नोलोजी (UCOST) का महानिर्देशक डा. दुर्गेश पन्तको विशेष निमन्त्रणा र रे (RAY) फाउन्डेसनको सहकार्यमा कार्यक्रममा सहभागी भएर विद्यार्थीहरूले वैज्ञानिकहरूसँग भेटघाट गर्ने, प्यानल छलफलमा भाग लिने र आफ्ना प्रस्तुति दिने अवसर पाउनेछन्।
सेमिनारको पहिलो दिन विद्यार्थीहरूले विज्ञान र प्रविधिका विभिन्न विषयमा ख्यातिप्राप्त विशेषज्ञ र वैज्ञानिकहरूसँग प्रत्यक्ष भेटघाट तथा अन्तरक्रिया गर्नेछन् भने प्यानल छलफलमा समेत आफ्नो सक्रिय सहभागिता जनाउनेछन्। कार्यक्रमको दोस्रो दिन विद्यार्थीहरूले आफ्ना मौलिक प्रोजेक्ट, अनुसन्धान र आविष्कारहरू प्रस्तुत गर्दै अन्य सहभागीहरूसँग अनुभव साटासाट गर्ने अवसर पाउनेछन्।
फाउन्डेसनका कार्यकारी निर्देशक डा. लक्ष्मण बस्नेतले आफ्ना विद्यार्थीहरूलाई अन्तर्राष्ट्रिय स्तरको वैज्ञानिक मञ्च उपलब्ध गराउनु गौरवको कुरा भएको बताउनुभयो। उहाँले यस सेमिनारले विद्यार्थीहरूलाई विश्वविख्यात वैज्ञानिकहरूसँग प्रत्यक्ष संवाद गर्ने र आफ्ना नवीनतम् अनुसन्धानहरू प्रदर्शन गर्ने सुनौलो अवसर प्रदान गर्ने बताउनुभयो। साथै, यस्ता गतिविधिले विद्यार्थीको किताबी ज्ञानलाई व्यवहारिक रूप दिँदै उनीहरूमा अनुसन्धान गर्ने क्षमता र आत्मविश्वासको विकास गर्ने विश्वास समेत व्यक्त गर्नुभयो।
सहभागी विद्यार्थीहरूका अनुसार यो सेमिनारले उनीहरूलाई विज्ञान र प्रविधिका क्षेत्रमा भइरहेका नयाँ सोच र विश्वव्यापी अनुसन्धानका ट्रेन्डहरूसँग परिचित गराउन महत्वपूर्ण भूमिका खेल्नेछ। विद्यालय प्रशासनले यस किसिमको अन्तर्राष्ट्रिय प्लेटफर्मले विद्यार्थीहरूको सिर्जनात्मकता र वैज्ञानिक दृष्टिकोणको विकास गर्नुका साथै उनीहरूमा अनुसन्धान क्षमता र आत्मविश्वास बढाउने विश्वास व्यक्त गरेको छ।
Discussion about this post