बैतडी । बैतडीको दोगडाकेदार गाउँपालिका वडा नम्बर–७ स्थायी घर भई श्रीकोट क्याम्पसमा बिएड प्रथम वर्षमा अध्ययनरत जेहेन्दार छात्रा आरती महरा यतिबेला गम्भीर स्वास्थ्य समस्यासँग लडिरहेकी छन्।
क्याम्पसको अध्ययनसँगै खेलकुदमा समेत निकै सक्रिय र लगनशील स्वभावकी आरती विगत एक सातादेखि फोक्सोसम्बन्धी रोगबाट थला परेपछि उनको अवस्था चिन्ताजनक बनेको हो।
जिल्लामा उपचार सम्भव नभएपछि उनलाई थप उपचारका लागि धनगढी रेफर गरिएको थियो। तर, धनगढी लैजाने क्रममा डडेलधुरा पुग्दा उनलाई श्वासप्रश्वासमा एक्कासि गम्भीर समस्या देखिएपछि तत्काल डडेलधुरा अस्पतालमा भर्ना गरिएको थियो। उनको स्वास्थ्य स्थिति जटिल बनेपछि भारतको बरेलीबाट भेन्टिलेटर सुविधा भएको एम्बुलेन्स मगाएर हाल धनगढीस्थित निसर्ग अस्पतालमा भर्ना गरिएको छ, जहाँ उनको सघन उपचार भइरहेको छ।
आर्थिक अवस्था अत्यन्तै कमजोर रहेको महरा परिवारका लागि उपचार प्रक्रिया ठुलो चुनौती बनेको छ। छोरीको जीवन बचाउनका लागि परिवारले आफ्नो तर्फबाट हरसम्भव प्रयास गरे पनि आर्थिक अभावका कारण उपचारलाई निरन्तरता दिन कठिन हुँदै गएको छ। एउटी जेहेन्दार छात्राको उपचारमा कुनै कमी नआओस् भनी परिवारले चिन्ता व्यक्त गरिरहेका छन्।
आरतीको जीवन रक्षाका लागि परिवारले स्थानीय सरकार, विभिन्न सामाजिक संघसंस्था, देश-विदेशमा रहेका नेपालीहरू र सम्पूर्ण मानवतावादी मनहरूसँग आर्थिक सहयोगको अपिल गरेको छ।
सहयोग गर्न इच्छुक महानुभावहरूले सिधै परिवारको सम्पर्क नम्बर ९८६६३०७०९५ मा फोन गरेर वा समन्वय गरेर सहयोग रकम उपलब्ध गराउन सक्नुहुनेछ।
Discussion about this post