सुनको मूल्य इतिहासमै पहिलो पटक ४ हजार अमेरिकी डलर नाघेको छ । विश्वभर आर्थिक र राजनीतिक अनिश्चितताको कारणले गर्दा लगानीकर्ताहरूले आफ्नो पैसा राख्न सुरक्षित ठाउँहरू खोजिरहेका बेला आज सुनको मूल्य प्रति औंस ४ हजार डलरको कीर्तिमानी उच्चतम विन्दुमा पुगेको बीबीसीले जनाएको छ ।
अमेरिकी राष्ट्रपति डोनाल्ड ट्रम्पले विश्वव्यापी व्यापारलाई उथलपुथल पार्ने कर घोषणा गरेपछि गएको अप्रिलमा सुनको मूल्य झन्डै एक तिहाइले बढेको छ । यो १९७० को दशकयताकै सबैभन्दा ठूलो वृद्धि हो ।
अमेरिकी सङ्घीय सरकार शटडाउनको दोस्रो हप्तामा प्रवेश गर्दै गर्दा प्रमुख आर्थिक तथ्यङ्क सार्वजनिक हुन ढिलाइ हुनु लगानीकर्ताहरूका लागि चिन्ताको अर्को विषय भएको विश्लेषकहरू बताउँछन् ।
सुनलाई सुरक्षित आश्रय लगानीका रूपमा हेरिन्छ जसले बजारको उथलपुथल वा आर्थिक मन्दीको समयमा यसको मूल्य कायम राख्ने वा बढाउने अपेक्षा गरिन्छ ।
विश्व सुन परिषद् व्यापार सङ्घका अनुसार यस वर्ष अहिलेसम्म सुन ईटीएफमा ६४ अर्ब डलरको कीर्तिमानी लगानी भएको छ ।
Discussion about this post