काठमाडौँ । नेपाली राष्ट्रिय महिला फुटबल टिमका प्रशिक्षक प्याट्रिक डे वाइल्डले राजीनामा गरेका छन् । प्याट्रिकले केही दिनअघि इमेलमार्फत अखिल नेपाल फुटबल संघ (एन्फा) लाई राजीनामा पठाएको बताइएको छ । एन्फा स्रोतले इमेल मार्फत वाइल्डले राजीनामा दिएको तर एन्फाले अझै निर्णय गरिनसकेको बताएको छ ।
वाइल्ड उज्बेकिस्तानमा भएको एएफसी एसियन कप छनोट प्रतियोगितापछि नेपाल नआएर सिधै बेल्जियम गएका थिए । उनले मिडियामा अन्तर्वार्ता दिदै एन्फाले आफुलाई सहयोग नगरेको, एन्फाको व्यवस्थापन निकै कमजोर रहेको र उनीहरुले नेपाली फुटबल सुधार्न नचाहेको आरोप लगाएका थिए । उनले टिमका खेलाडी पेनाल्टी हान्न समेत नमानेको बताउदै खेल अघि प्रधानमन्त्रीसँग भएको कुराकानीले पनि खेलाडीमा दबाब बढेको समेत बताएका थिए ।
वाइल्डक आरोपपछि उज्बेकिस्तान गएको नेपाली टोलीका अफिसियलहरुले एन्फा कम्प्लेक्समा असार २५ गते पत्रकार सम्मेलन गर्दै कप्तान चयन लगायतका विषयमा प्रमुख प्रशिक्षक वाइल्डका कारण टिममा विवाद भएको बताएका थिए ।
एन्फाले जेठ २२ गते राष्ट्रिय महिला फुटबल टोलीको मुख्य प्रशिक्षकमा बेल्जियमका वाइल्डलाई नियुक्त गरेको थियो ।
Discussion about this post