कञ्चनपुर । कञ्चनपुरको दोधारा चाँदनी नगरपालिका वडा नन्बर -६, कालागड टोलमा विषालु च्याउको तरकारी खाँदा एकै परिवारका पाँच जना बिरामी परेका छन्। उनीहरूको दोधारा चाँदनी अस्पतालमा उपचार भइरहेको र स्वास्थ्य अवस्था सामान्य रहेको प्रहरीले जनाएको छ।
जिल्ला प्रहरी कार्यालय कञ्चनपुरका प्रवक्ता तथा सूचना अधिकारी प्रहरी नायव उपरीक्षक सागर बोहराका अनुसार, बिरामी हुनेहरूमा ६३ वर्षीया कालु सुनार, उहाँकी १८ वर्षीया नातिनी निशा सुनार, १६ वर्षीय नाति भीम सुनार, १२ वर्षीय नाति बसन्त सुनार र ८ वर्षीया नातिनी मन्सु सुनार रहेका छन्।
उनीहरूले भारतको नङ्ग्रा जङ्गलबाट ल्याएको च्याउको तरकारी खाएका थिए। च्याउ सेवन गरेपछि बिरामी परेका उनीहरूलाई तत्काल दोधारा चाँदनी अस्पताल पुर्याइएको थियो। हाल पाँचै जनाको स्वास्थ्य अवस्था सामान्य रहेको जिल्ला प्रहरी कार्यालयले जनाएको छ।
यस घटनाले जङ्गली च्याउ सेवन गर्दा सावधानी अपनाउनुपर्ने आवश्यकतालाई पुनः प्रकाश पारेको छ।
Discussion about this post