कञ्चनपुर । कञ्चनपुरको कृष्णपुर नगरपालिका वडा नम्बर १ निगाली टोलमा २८ वर्षीया कमला आउजी दमाईको सर्प दंशबाट छाउगोठमा मृत्यु भएको घटनापछि जिल्ला प्रशासन कार्यालय कञ्चनपुरले जिल्लाभर छाउगोठ भत्काउन निर्देशन दिएको छ । प्रमुख जिल्ला अधिकारी लक्ष्मण ढकालले सोमबार ९ वटै स्थानीय तहलाई पत्र पठाउँदै परम्परागत रूपमा जरा गाडेर बसेको छाउपडीजस्तो सामाजिक कुप्रथा अन्त्य गर्न अभियान सञ्चालन गर्न अनुरोध गरेका हुन् ।
यो निर्देशन भीमदत्त, दोधाराचाँदनी, वेदकोट, शुक्लाफाँटा, कृष्णपुर, पुनर्वास, बेलौरी नगरपालिका र बेलडाँडी तथा लालझाडी गाउँपालिकालाई सम्बोधन गरिएको छ । जिल्ला समन्वय समितिको कार्यालय कञ्चनपुरलाई समेत बोधार्थ दिइएको पत्रमा समाजमा अझै गहिरो गरी जरा गाडेर बसेको छाउपडी प्रथालाई विधिवत् अन्त्य गर्ने अभियानमा सबै तहको समन्वय आवश्यक भएको उल्लेख गरिएको छ ।
कमला आउजी दमाईको दुःखद निधनपछि निगाली टोलका महिलाहरूमा डर र आक्रोश दुवै बढेको छ । यस घटनाले छाउपडी प्रथाको भयावह परिणामलाई उजागर गरेको छ । कृष्णपुर नगरपालिकाले भने आइतबार नै १५ दिनभित्र छाउगोठ भत्काउन सूचना जारी गरिसकेको थियो ।
अधिकारकर्मीहरूले कञ्चनपुर प्रशासनको यो निर्णयलाई स्वागत गर्दै स्थायी रूपमा परिवर्तन ल्याउनका लागि चेतनामूलक कार्यक्रम र कानुनी कारबाहीका कदम पनि सँगै अघि बढाइनुपर्नेमा जोड दिएका छन् । उनीहरूले छाउपडी प्रथा समाजमा गहिरो गरी जकडिएको हुनाले यसलाई निर्मूल पार्न बहुआयामिक प्रयास आवश्यक रहेको बताएका छन् ।
Discussion about this post