कुन्दन पाण्डेय, कञ्चनपुर । भीमदत्त नगरपालिकाले आगामी आर्थिक वर्ष २०८२/०८३ का लागि १ अर्ब ९३ करोड ८३ लाख २३ हजार ३ सय १९ रुपैयाँ बराबरको वार्षिक नीति तथा कार्यक्रम र बजेट पारित गरेको छ । मंगलबार नगरपालिकाको नगर सभा हलमा बसेको १७औँ नगरसभाको बैठकबाट यो नीति तथा कार्यक्रम र बजेट सर्वसम्मतले पारित भएको हो ।
नगरपालिकाले ल्याएको बजेटको मुख्य विशेषतामा छोरी–बुहारी उच्च शिक्षा अध्ययन छात्रवृत्ति कार्यक्रम प्रमुख रहेको छ । आर्थिक अभावका कारण कुनै पनि छोरी–बुहारी उच्च शिक्षाबाट वञ्चित नहोस् भन्ने उद्देश्यले यो कार्यक्रम ल्याइएको नगरपालिकाले जनाएको छ ।
नगरप्रमुख पदम बोगटीका अनुसार, बजेटको स्रोतमा आन्तरिक आयबाट ३३ करोड, संघीय सरकारबाट वित्तीय समानिकरण अनुदान २३ करोड ९१ लाख, प्रदेश सरकारबाट वित्तीय समानिकरण अनुदान २ करोड ३७ लाख ६० हजार, संघीय सरकारबाट सशर्त अनुदान ५३ करोड २९ लाख, संघीय सरकारबाट राजस्व बाँडफाँडको १७ करोड २२ लाख ६३ हजार ३ सय १९ र प्रदेश सरकारबाट राजस्व बाँडफाँडको ८४ लाख प्राप्त हुने अनुमान गरिएको छ ।
यसका साथै विशेष अनुदान (संघीय सरकारबाट) ७८ लाख, विशेष अनुदान (प्रदेश सरकारबाट) ६० लाख, सडक बोर्ड नेपालबाट १ करोड, सामाजिक सुरक्षातर्फ ५७ करोड, क्षेत्रीय शहरी विकास आयोजनाबाट २० लाख र नगद मौज्दात २ करोड बजेटको स्रोतका रूपमा रहनेछन् ।
यसपटकको बजेटमा भीमदत्त नगरपालिकाले विविध क्षेत्रलाई समेटेको छ । निःशुल्क शव वाहन सेवा सञ्चालन गरिनेछ, जसले नगर क्षेत्रभित्र शवयात्राका लागि शव वाहनको प्रयोग निःशुल्क बनाउनेछ । शैक्षिक गुणस्तर अभिवृद्धि र विद्यार्थीहरूको रचनात्मकता प्रस्फुटनका लागि विद्यालयहरूमा ‘बुक फ्रि फ्राईडे’ कार्यक्रम सञ्चालन गरिनेछ । सामाजिक न्यायको दृष्टिकोणले नगरपालिकाको दुर्गम क्षेत्र, अति विपन्न, दलित, लोपोन्मुख जाति, द्वन्द्वपीडित, महामारी तथा विपद् प्रभावित, हिंसामा परेका महिला, बालबालिका, अपाङ्गता भएका व्यक्ति र सहाराविहीन व्यक्तिहरूका लागि ‘मेयर अन द स्पट’ कार्यक्रम लाई निरन्तरता दिइएको छ ।
नगरवासीको अत्यावश्यक माग, आवश्यकता र समस्या सम्बोधन गर्न ‘नगरप्रमुख पूर्वाधार विकास कार्यक्रम’ ल्याइएको छ । सार्वजनिक जग्गाको संरक्षणका लागि नगरपालिका क्षेत्रमा रहेका सार्वजनिक जग्गाहरूको पहिचान, संरक्षण र लगत तयार गरी अतिक्रमित जग्गा क्रमशः खाली गराई संरक्षण गरिनेछ । वातावरणमैत्री नगर बनाउने उद्देश्यले भीमदत्त नगरपालिकालाई विषादीमुक्त बनाउन प्राङ्गारिक एवम् जैविक मल उत्पादन गर्ने किसानलाई प्रोत्साहन गरिनेछ । शैक्षिक क्षेत्रमा थप सहयोग पुर्याउन ‘विद्यार्थीसँग मेयर कार्यक्रम’ र ‘जेहेनदार विद्यार्थी छात्रवृत्ति कार्यक्रम’ अन्तर्गत नगर क्षेत्रका विद्यालयहरूबाट अध्ययन गरेका विपन्न तथा जेहेनदार विद्यार्थीहरूको उच्च शिक्षामा पहुँच बढाउन छात्रवृत्तिको व्यवस्थालाई निरन्तरता दिइएको छ ।
स्वास्थ्य सेवामा पनि नगरपालिकाले ध्यान दिएको छ । ७५ वर्ष उमेर पूरा भएका ज्येष्ठ नागरिकहरूलाई आधारभूत स्वास्थ्य सेवा घरदैलो कार्यक्रम लाई निरन्तरता दिइनेछ । प्रसूति सेवा केन्द्रबाट प्रवाह हुने सेवालाई थप व्यवस्थित गर्दै संस्थागत प्रसूति सेवा प्रोत्साहन गर्न गर्भवती सुत्केरीहरूका लागि नगरभित्र निःशुल्क एम्बुलेन्स सेवा लाई निरन्तरता दिई प्रभावकारी बनाइनेछ । समग्रमा, शिक्षा, स्वास्थ्य, कृषि र पर्यटनलाई उच्च प्राथमिकतामा राखेर नीति तथा कार्यक्रम प्रस्तुत गरिएको छ ।
नगरप्रमुख तथा नगरसभा अध्यक्ष बोगटीले प्रस्तुत गरेको नीति तथा कार्यक्रम र बजेटलाई नगरसभा सदस्यहरूले सर्वसम्मतले पारित गरेका छन् । बैठकमा नगर सदस्यहरूले उठाएका विषय र सुझावहरूलाई यथासम्भव समावेश गरी बजेट र नीति तथा कार्यक्रम कार्यान्वयन गरिने विश्वास नगरप्रमुख बोगटीले व्यक्त गरेका छन् ।
Discussion about this post