कञ्चनपुर – दार्चुलाको लेकम गाउँपालिका-१, सर्मोली (कोठार) मा रहेको बिष्ट परिवार यतिबेला चर्चाको शिखरमा छ। एउटै कोखबाट जन्मिएका तीन दाजुभाइ नेपाली सेनामा कार्यरत हुनु, र त्यसमाथि परिवारका अन्य सदस्यहरू पनि विभिन्न सुरक्षा निकायमा आवद्ध हुनुले यो परिवार देश सेवामा पूर्ण रूपमा समर्पित भएको देखिन्छ।
बुवा सुनपति बिष्ट र आमा तिला देवी बिष्टका छोराहरू सुरेश सिंह बिष्ट, चन्द्र सिंह बिष्ट र दीपक बिष्ट नेपाली सेनामा कार्यरत छन्। जेठा छोरा सुरेश सिंह बिष्ट रसुवाको श्री श्रीनाथ गणमा अमल्दार पदमा कार्यरत छन्। २०६९ सालमा सैन्य पदबाट भर्ना भएका सुरेश कुशल, कर्तव्यनिष्ठ र साहसी कर्मचारीका रूपमा चिनिन्छन्। उनले विभिन्न विपद् व्यवस्थापन कार्यमा उद्धारको भूमिका निर्वाह गरिसकेका छन् र छिट्टै पदोन्नतिका लागि लाइनमा रहेको बताइन्छ।
माइला छोरा चन्द्र सिंह बिष्ट रुपन्देही (बुटवल) को श्री कीर्तिदल गणमा प्युठ पदमा कार्यरत छन्। २०७४ सालमा सैन्य पदबाट संगठनमा भर्ना भएका चन्द्र प्राकृतिक प्रकोपमा प्रशंसनीय काम गर्ने कर्मचारीका रूपमा परिचित छन्। कान्छा छोरा दीपक बिष्ट भने भर्खरै २०८२ सालमा सैन्य पदमा भर्ना भई डडेल्धुराको श्री अर्जुनबाण गणमा सैन्य आधार तालिम लिइरहेका छन्।
दार्चुलाको लेकममा एउटै परिवारबाट तीन जना दाजुभाइ नेपाली सेनामा आबद्ध भएको यो नै एक मात्र उदाहरण हो। यो परिवारको देश सेवाप्रतिको समर्पणले गाउँदेखि देशभरका युवाहरूलाई संगठनप्रति प्रेरणा मिल्ने विश्वास गरिएको छ।
बिष्ट दम्पतिका चारै छोराले दार्चुला लेकमको श्री बडिपुर मा.वि. सर्मोलीबाट एसएलसी उत्तीर्ण गरेका छन् र प्रविणता तहदेखि उच्च शिक्षासम्मको अध्ययन गरेका छन्।
जेठा, माइला र कान्छा छोरा सेनामा हुँदा साइँला छोरा नरेन्द्र बिष्ट पनि कम छैनन्। उनी शैक्षिक संस्थामा आबद्ध रही लोक सेवा आयोगका कक्षाहरू पढाउँदै आइरहेका छन्। संघीय र प्रदेश निजामती सेवाको दुई पटक वेटिङ लिस्टमा परेका नरेन्द्रले हालै लुम्बिनी प्रदेशबाट लोक सेवा आयोगको लिखित परीक्षा उत्तीर्ण गरेका छन्। प्रशिक्षक पेशामा राम्रो हुँदाहुँदै पनि निजामती सेवामा प्रवेश गर्ने उनको इच्छा छ।
सुनपति बिष्टका भाइहरूका छोराहरूले पनि देश सेवामा महत्त्वपूर्ण योगदान पुर्याइरहेका छन्। बुवा शम्भु सिंह बिष्ट र आमा बिन्दा देवी बिष्टका जेठा छोरा भरत सिंह बिष्ट बैतडी जिल्लामा प्रहरी सहायक हवल्दार पदमा कार्यरत छन् भने सहोदर भाइ प्रेम बिष्ट प्रहरी सहायक निरीक्षक (एएसआई) पदमा भर्ना भई हाल काठमाडौंमा कार्यरत छन्।
सुनपतिका अन्य भाइका छोराहरू धिरेन्द्र बिष्ट डडेल्धुरामा सशस्त्र प्रहरी सहायक हवल्दार, भानु बिष्ट डडेल्धुरामा प्रहरी जवान, बिरेन्द्र बिष्ट डोटीमा सशस्त्र प्रहरी जवान र भीम बिष्ट स्याङ्जामा नेपाली सेनाको प्युठ दर्जामा कार्यरत छन्।
परिवारको पछिल्लो पुस्ताले पनि देशका तीनवटै सुरक्षा संगठनबाट देशको सेवामा लागेको देख्दा बुवा सुनपति बिष्ट निकै खुसी छन्। उनले यो सेवालाई कायम राखि आउँदा पुस्तामा पनि निरन्तरता मिलोस् भन्ने कामना समेत गरेका छन्।
Discussion about this post