कञ्चनपुर । शुक्लाफाँटा राष्ट्रिय निकुञ्ज मध्यवर्ती क्षेत्र पूर्वी सेक्टरअन्तर्गत सुनदेवी उपभोक्ता समिति, शुक्लाफाँटा-०६, कञ्चनपुरमा विद्युतीय चुलो वितरण कार्यक्रम सम्पन्न भएको छ। यस कार्यक्रमले दाउराको प्रयोग घटाउँदै स्वस्थ जीवनशैली र आर्थिक बचतमा टेवा पुग्ने विश्वास गरिएको छ।
सुनदेवी उपभोक्ता समितिको समन्वयमा शुक्लाफाँटा नगरपालिका, सामाजिक चेतना तथा विकास संघ (साडा नेपाल) र कनेक्ट परियोजनाको आर्थिक तथा प्राविधिक सहयोगमा करिब ८५ उपभोक्तालाई विद्युतीय चुलो सेट वितरण गरिएको हो। यस सेटमा इन्डक्सन चुलो, प्रेसर कुकर, कराई र तावा समावेश छन्।
शुक्लाफाँटा नगरपालिकाका नगर प्रमुख रणबहादुर महराको प्रमुख आतिथ्य र नगर उपप्रमुखको विशिष्ट आतिथ्यमा सम्पन्न भएको यस कार्यक्रममा समन्वय र सहयोग गर्ने संघसंस्थाका प्रतिनिधि तथा स्थानीय जनप्रतिनिधिहरूको समेत उपस्थिति थियो। कार्यक्रमको अध्यक्षता उपभोक्ता समितिका अध्यक्ष भरत बहादुर विष्टले गर्नुभएको थियो।
कनेक्ट परियोजनाका परियोजना संयोजक मनोज ओझाले रेमिट्यान्सले धानेको नेपालले वार्षिक करिब ६५ अर्ब रुपैयाँ एलपी ग्यास खरिदमा विदेश पठाउनुपर्ने बाध्यतालाई केही हदसम्म भए पनि कम गर्न यो कार्यक्रमले मद्दत पुग्ने बताउनुभयो। उहाँका अनुसार नेपालमै उत्पादित बिजुलीको प्रयोगले समुन्नत नेपाल निर्माणमा सहयोग पुग्नेछ।
ओझाले जंगल तथा निकुञ्जभित्र प्रवेश गरेर दाउरा भित्र्याउने परिवारलाई जोखिम न्यूनीकरण गर्न सहुलियत स्वरूप यो चुलो सेट वितरण गरिएको जानकारी दिनुभयो।
विश्व स्वास्थ्य संगठनको अनुसन्धान रिपोर्टले नेपालमा वार्षिक करिब २२,८०० मानिस दाउरा, गुइँठाजस्ता इन्धनबाट निस्केको धुवाँका कारण श्वासप्रश्वाससम्बन्धी रोगबाट मर्ने गरेको देखाएको छ। यस कार्यक्रमले स्वास्थ्यका लागि, आर्थिक र समयको बचतका लागि पनि लाभकारी रहेको ओझाले बताउनुभयो।
कार्यक्रममा सम्बोधन गर्दै नगर प्रमुख महराले आगामी दिनमा पनि यस्तै किसिमका परियोजनामा सहकार्य गर्ने प्रतिबद्धता व्यक्त गर्नुभयो। यस अवसरमा स्थानीय जनप्रतिनिधि र विभिन्न संघसंस्थाको समेत सक्रिय सहभागिता रहेको थियो।
Discussion about this post