कञ्चनपुरमा सुक्खा बन्दरगाह निर्माणस्थलका १०९ रुख गायब

कञ्चनपुर – कञ्चनपुरको दोधाराचाँदनी नगरपालिका–१, चाँदनी गौरीशंकर मध्यवर्ती सामुदायिक वनमा सुक्खा बन्दरगाह निर्माणका लागि छपान गरिएका १०९ रुख गायब भएका छन्। ४२ हेक्टर क्षेत्रफलमा निर्माणाधीन यो बन्दरगाहका लागि गत वर्ष शुक्लाफाँटा राष्ट्रिय निकुञ्जले दुई पटक (भदौ र माघमा) जिपिएस प्रविधिबाट रुख छपान गरेको थियो। तर, कटान आदेशअघि नै १,७०२ रुखमध्ये १,५९३ मात्र भेटिएको निकुञ्जका संरक्षण अधिकृत तथा सूचना अधिकारी पुरुषोत्तम बाग्लेले बताए। उनका अनुसार ४० रुख र ६९ पोल गायब भएका छन्।

निकुञ्जले सामुदायिक वनसँग स्पष्टीकरण माग्दा, सीमा क्षेत्रमा चोरी–तस्करी, नजिकैको मसानघाटमा अन्त्येष्टीका लागि सुकेका रुख प्रयोग भएको वा रातको समयमा बन्यजन्तुको आवागमन र गस्ती अभावमा तस्करी भएको हुन सक्ने जवाफ प्राप्त भएको बाग्लेले बताए। निकुञ्जले ९२ क्युफिट काठसहित तीन जनामाथि कारबाही अघि बढाएको छ भने अन्य तस्करमाथि पनि कारबाही हुने उनको भनाइ छ।

स्थानीय नरेन्द्र लुहारले यस्तो ठूलो योजनामा सयौं रुख गायब हुनु मिलेमतोबिना सम्भव नभएको भन्दै विस्तृत छानबिनको माग गरेका छन्। उनले भरियालाई मात्र पक्राउ गरेर नहुने र मुख्य योजनाकारमाथि कारबाही आवश्यक रहेको बताए। यता, गौरीशंकर मध्यवर्ती सामुदायिक वनका अध्यक्ष दामोदर भट्टले निकुञ्जले नै छपान गरेको र रुख गायब भएको भनाइप्रति आश्चर्य व्यक्त गर्दै कुनै बदमासी नभएको दाबी गरे। दोधाराचाँदनी नगरका मेयर किशोर कुमार लिम्बुले पनि रुख गायब भएको विषयमा गहिरो छानबिनको आवश्यकता औंल्याए। स्थानीयले बाँकी रुख कटानअघि तस्करीको छानबिन गर्न माग गरेका छन्, नत्र काटिएका रुखको काठमा पनि अनियमितता हुने आशंका व्यक्त गरेका छन्।

नेपाल इन्टरमोडेल यातायात विकास समितिले गत वैशाखदेखि रुख कटान शुरू गरेको हो। सुक्खा बन्दरगाह निर्माण १८ जेठ ०८० मा तत्कालीन प्रधानमन्त्री पुष्पकमल दाहाल ‘प्रचण्ड’को भारत भ्रमणका क्रममा भारतीय समकक्षी नरेन्द्र मोदीसँग भएको समझदारीअनुसार अघि बढेको हो। भारतले एकीकृत चेकजाँच चौकी (आइसिपी) निर्माण गरिदिने र आफ्नोतर्फको संरचना बनाइसकेको छ। यो बन्दरगाह ०६४ मा तत्कालीन मन्त्री लेखराज भट्टको पालामा प्रस्तावित भई ०६६ मा निर्माण निर्णय भएको थियो। सुरुमा दोधारा–चाँदनी–७, कञ्चनभोजमा बनाउने भनिए पनि स्थानीय विवादले चाँदनी–१ मा सारिएको हो। १८ वर्षपछि काम अघि बढ्दा स्थानीय हर्षित भए पनि रुख गायब प्रकरणले चिन्ता थपिएको छ।