काठमाडौं – नेपाल राष्ट्र बैंकको नयाँ गभर्नरमा डा. विश्व पौडेल नियुक्त भएका छन्। मंगलबार बसेको मन्त्रीपरिषद्को बैठकले पौडेललाई गभर्नर नियुक्त गर्ने निर्णय गरेको हो। करिब डेढ महिनादेखि रिक्त रहेको गभर्नर पदमा सरकारको लामो रस्साकस्सीपछि पौडेलको नियुक्ति गरिएको हो।
गभर्नर नियुक्तिका लागि गठित सिफारिस समितिले तीन जनाको नाम सिफारिस गरेको थियो, जसमा डा. पौडेल पहिलो नम्बरमा थिए। अन्य सिफारिसमा निलम ढुंगाना र दिनेश भट्टराई रहेका थिए। चैत २४ गतेदेखि रिक्त रहेको गभर्नर पदमा डेपुटी गभर्नर निलम ढुंगानाले कामुक रूपमा कार्यभार सम्हाल्दै आएकी थिइन्।
प्रचलित कानुनअनुसार गभर्नरको पद रिक्त हुनुभन्दा एक महिनाअघि नै नयाँ नियुक्ति गरी सार्वजनिक सूचनामार्फत जानकारी गराउनु पर्ने प्रावधान भए पनि राजनीतिक तानातानका कारण नियुक्तिमा ढिलाइ भएको हो।
डा. पौडेलको पृष्ठभूमि
नवनियुक्त गभर्नर डा. विश्व पौडेल विगतमा गभर्नर सिफारिस समितिमा विज्ञ सदस्यका रूपमा संलग्न थिए। गभर्नरको दौडमा आफूलाई अघि बढाउने उद्देश्यले उनले सो समितिबाट राजीनामा दिएका थिए। उनी नेपाली कांग्रेसका सभापति शेरबहादुर देउवाका निकट विश्वासपात्रका रूपमा समेत चिनिन्छन्।
डा. पौडेल २०७८ साल साउन १२ गते प्रधानमन्त्री देउवाको कार्यकालमा राष्ट्रिय योजना आयोगको उपाध्यक्षमा नियुक्त भएका थिए। वर्तमानमा पनि कांग्रेस सत्ता साझेदार रहेको बेला उनलाई राष्ट्र बैंकको नेतृत्वमा ल्याइएको हो।
चितवन निवासी डा. पौडेलले चीनको एक विश्वविद्यालयबाट इन्जिनियरिङमा स्नातक गरेका छन् भने अमेरिकाको युनिभर्सिटी अफ क्यालिफोर्नियाबाट अर्थशास्त्रमा विद्यावारिधि (PhD) हासिल गरेका छन्।
नेपाल राष्ट्र बैंकको नेतृत्वमा डा. पौडेलले समसामयिक आर्थिक चुनौतीहरूसँग जुझ्दै मौद्रिक नीतिमा सन्तुलन कायम गर्ने अपेक्षा गरिएको छ।
Discussion about this post