कञ्चनपुर । राष्ट्रिय परीक्षा बोर्डले कक्षा १२ को परीक्षा शान्तिपूर्ण र मर्यादित ढंगले सम्पन्न भएको भन्दै परीक्षामा सहभागी सबै निकायलाई धन्यवाद दिएको छ।
बोर्डले आज एक धन्यवाद ज्ञापनपत्र जारी गर्दै सहयोग गर्ने निकाय र व्यक्तिहरूलाई धन्यवाद दिएको हो। वैशाख २१ गतेदेखि (नेपालमा १५९० र जापानमा १ गरी जम्मा १५९१ परीक्षा केन्द्रमा) सञ्चालन भएको माध्यमिक शिक्षा उत्तीर्ण परीक्षा (कक्षा १२) जेठ २ गते सम्पन्न भएको थियो।
‘परीक्षालाई शान्तिपूर्ण, मर्यादित, व्यवस्थित, अनुशासित र सौहार्दपूर्ण वातावरणमा सम्पन्न गराउन सहयोग पुऱ्याउनु हुने संघीय सरकारअन्तर्गतका सम्बन्धित निकायहरू, जापानस्थित नेपाली दूतावास, केन्द्रीय सुरक्षा समिति, प्रदेश सरकार अन्तर्गतका सम्बन्धित निकायहरू, प्रदेश परीक्षा व्यवस्थापन समिति, जिल्ला परीक्षा समन्वय समिति, सबै तहका सुरक्षा संयन्त्र, सबै स्थानीय पालिका, गाउँपालिका राष्ट्रिय महासंघ, नगरपालिका संघ, सबै विद्यालय व्यवस्थापन समिति, प्रधानाध्यापक, केन्द्राध्यक्ष/सहायक केन्द्राध्यक्षलगायत शिक्षक, कर्मचारी, अभिभावक, सेवा प्रदायक संस्थाहरू, सम्बन्धित सबै सरकारी तथा गैर सरकारी निकायहरू, आमसञ्चार माध्यम एवं सम्पूर्ण सरोकारवालाहरूप्रति राष्ट्रिय परीक्षा बार्डको तर्फबाट हार्दिक आभार व्यक्त गर्दै धन्यवाद ज्ञापन गर्दछौँ,’पत्रमा उल्लेख छ।
यस्तै बोर्डले आगामी दिनमा सञ्चालन हुने परीक्षालाई समेत मर्यादित र व्यवस्थित रूपमा सञ्चालन गर्ने कार्य र बोर्डबाट सम्पादन हुने अन्य कार्यमा समेत आ-आफ्नो जिम्मेवारी अनुसार सम्बन्धित सबैबाट पूर्ण सहयोग प्राप्त हुने अपेक्षा लिएको जनाएको छ।
Discussion about this post