काठमाण्डाै – कृषि, सहकारी तथा पशुपक्षी विकासमन्त्री रामनाथ अधिकारीले चालू आर्थिक वर्ष सबै बालीहरूको उत्पादन सामान्य रूपमा बढ्ने प्रारम्भिक अनुमान रहेको बताउनुभएको छ ।
प्रतिनिधिसभाको आजकाे बैठकमा सांसदहरूले सोधेका जिज्ञासाको जवाफ दिँदै कृषिमन्त्री अधिकारीले उत्पादन बढ्ने अनुमान रहेको बताउनुभयो । उहाँका अनुसार सरकारले गएको चैत मसान्तसम्म १५ लाख ६ सय ९२ बेर्ना, बिरुवा बिक्री/वितरण गरेको छ ।
मन्त्री अधिकारीले नेपालमा मूलतः स्याउ, ओखर, मेवा, अङ्गुर, नरिवल, अनारजस्ता फलफूलहरू भारत, चीनलगायतका देशहरूबाट आउने गरेको बताउनुभयो । उहाँले चालू आर्थिक वर्षको चैत महिनासम्म ४७ अर्ब ८ करोड रुपैयाँको खाद्यान्न आयात भएको र ६ करोड २० लाख रुपैयाँको निर्यात भएको बताउनुभयो । खाद्यान्न बालीमा व्यापार घाटा ४७ अर्ब ७ करोड रुपैयाँ रहेको छ ।
साउनदेखि चैतसम्मको नौ महिनामा देशमा ३१ अर्ब ५२ करोडको तरकारी र १८ अर्ब २० करोड रुपैयाँको फलफूल भित्रिएको कृषिमन्त्री अधिकारीले जानकारी दिनुभयो ।
Discussion about this post