कञ्चनपुर – आर्थिक अभावका कारण सुदूरपश्चिम प्रदेश, दार्चुलाका एक युवा गम्भीर संकटमा परेका छन्। लामो समयदेखि क्यान्सर रोगसँग संघर्ष गरिरहेका महाकाली नगरपालिका-२, पण्डोराका जमन सिंह कार्कीलाई उपचार खर्च जुटाउन धौधौ भएको छ।
कञ्चनपुरको महेन्द्रनगरस्थित सिद्धनाथ विज्ञान क्याम्पसका पूर्व विद्यार्थीसमेत रहेका कार्की हाल बुटवलमा बसोबास गर्दै आएका छन्। उनी विगत चार महिनादेखि काठमाडौंको शिक्षण अस्पताल महाराजगञ्जमा क्यान्सरको उपचार गराइरहेका छन्।
कार्कीको उपचारमा आर्थिक समस्या देखिएको परिवारजनले बताएका छन्। दार्चुलाका किसान लालसिंह कार्कीका छोरा जमन सिंहको उपचारमा अहिलेसम्म भएको सबै रकम सकिएपछि परिवारलाई थप उपचार कसरी गर्ने भन्ने चिन्ताले सताएको छ।
क्यान्सर पीडित कार्कीका भिनाजु सुरेश सिंह भण्डारीले उनको उपचारका लागि लाखौं रुपैयाँ खर्च भइसकेको जानकारी दिए। उनले भने, “भएको पैसा चार महिनादेखि उपचारमै सकियो, ऋण निकालेर पनि उपचार गरियो, अब त्यो पैसा पनि सकियो। अस्पतालमा अझै पैसा लाग्ने भनिएको छ, कहाँबाट ल्याएर उपचार गर्ने भन्ने ठूलो संकटमा परेका छौं।”
आर्थिक अभावकै कारण उपचार रोकिने अवस्था आएपछि कार्की र उनको परिवारले सहयोगका लागि सबैलाई अपिल गरेका छन्। उनीहरूले सहयोगी मन भएका व्यक्ति तथा संस्थाहरूलाई आर्थिक सहयोग प्रदान गरी जमनको जीवन रक्षामा मद्दत गर्न आग्रह गरेका छन्।
Discussion about this post