कञ्चनपुर – सुदूरपश्चिम विश्वविद्यालयका विद्यार्थीले डिजिटल डाटा संकलनका लागि सफ्टवेयर निर्माण गरेका छन्। विश्वविद्यालयको केन्द्रीय कम्प्युटर विज्ञान तथा सूचना प्रविधि विभागका ४८ जना विद्यार्थीमध्ये ७ जनाले यो सफ्टवेयर तयार पारेका हुन्।
विभाग प्रमुख कर्णदेव भट्टका अनुसार, दुई महिनाको मेहनतपछि विद्यार्थीले निर्माण गरेको सफ्टवेयर बुधबार विश्वविद्यालयको केन्द्रीय कार्यालयमा प्रस्तुत गरिएको छ। “पहिलो पटक हामीले विद्यार्थीमार्फत डिजिटल डाटा संकलन गरेर सफ्टवेयर बनाएका छौं,” उनले भने, “आगामी दिनमा थप नवीन कार्यक्रम ल्याउने योजना छ।”
स्नातक तहको ‘पढ्दै कमाउँदै’ कार्यक्रमअन्तर्गत विद्यार्थीलाई खाजा खर्च प्रदान गरिएको छ। शिक्षण सहायक प्रकाश साउदले कोरोना महामारीका बेला विश्वविद्यालयले अनलाइन परीक्षाका लागि सफ्टवेयर बनाएको स्मरण गर्दै आगामी दिनमा यस्ता नवीन क्षेत्रमा विद्यार्थीलाई प्रोत्साहन गर्न विश्वविद्यालयको सहयोग आवश्यक रहेको बताए।
विज्ञान संकायका डीन डा. भवानी चन्दले विश्वविद्यालयले कम्प्युटर विज्ञान र सूचना प्रविधिका क्षेत्रमा ज्ञान र सीप विकासका कार्यक्रम अघि बढाएको उल्लेख गरे। उनले विद्यार्थीले समयसापेक्ष नवीन क्षेत्रमा चासो राखेर अघि बढ्नुपर्नेमा जोड दिए।
उपकुलपति प्रा.डा. हेमराज पन्तले सूचना, विज्ञान र प्रविधिका क्षेत्रमा विश्वविद्यालयले लगानी गर्ने प्रतिबद्धता व्यक्त गरे। “विश्वविद्यालयले सृजनात्मक र समाजका लागि उपयोगी कार्यक्रम उत्पादनमा सहयोग गर्नेछ,” उनले भने, “विद्यार्थीले सूचना प्रविधिको क्षेत्रमा अग्रसर भएर काम गर्नुपर्छ।” उनले विद्यार्थीलाई प्रमाणपत्र र खाजा खर्च हस्तान्तरण गर्दै उनीहरूको सीप देश र समाजको विकासमा प्रयोग गर्न सुझाव दिए।
Discussion about this post