बैतडी – बैतडी जिल्लाको दशरथचन्द नगरपालिका–१ स्थित मणिलेक माध्यमिक विद्यालयले शिक्षा ऐन २०७५ को दफा २० र शिक्षा नियमावली २०७७ को नियम ५ अनुसार नियमविपरीत उठाइएको शुल्क फिर्ता गर्ने निर्णय गरेको छ।
विद्यालयले २०८२ वैशाख २४ गते बुधबार बसेको बैठकमा विद्यार्थी तथा अभिभावकहरूसँग लिएको शुल्क फिर्ता गर्ने निर्णय गरेको नेपाल विद्यार्थी संघ, बैतडीका कार्यवाहक अध्यक्ष अमर टेरले जानकारी दिनुभयो। यसअघि जिल्ला शिक्षा विकास तथा समन्वय इकाई र दशरथचन्द नगरपालिका शिक्षा शाखाले सामुदायिक विद्यालयहरूले शुल्क नलिन स्पष्ट निर्देशन दिएका थिए।
विद्यालयले निःशुल्क शिक्षाको कानुनी व्यवस्था कार्यान्वयन गर्न थालेसँगै विद्यार्थी, अभिभावक र विद्यार्थी संगठनहरूमा उत्साह देखिएको छ। नेपाल विद्यार्थी संघ, बैतडीले लामो समयदेखि सामुदायिक विद्यालयमा लिइँदै आएको अवैध शुल्कको विरोधमा दबाबमूलक कार्यक्रम सञ्चालन गर्दै आएको थियो।
संघका कार्यवाहक अध्यक्ष टेरले अन्य सामुदायिक विद्यालयहरूले पनि नियमविपरीत शुल्क लिएको पाइएमा कडा कदम चालिने चेतावनी दिएका छन्। “हामी हाम्रो अभियानलाई देखावटी मात्र बनाउने पक्षमा छैनौं, नतिजा देखिने गरी काम गर्छौं। जबसम्म विद्यार्थीले वास्तविक राहत महसुस गर्दैनन्, हाम्रो संघर्ष निरन्तर जारी रहनेछ,” अध्यक्ष टेरले स्पष्ट पार्नुभयो।
Discussion about this post