कञ्चनपुर । मझगाउँ विमानस्थल पुन: सञ्चालन समितिले महेन्द्रनगर विमानस्थल निर्माण कार्यलाई तीव्रता दिन नेपाल सरकारका संस्कृति, पर्यटन तथा नागरिक उड्डयन मन्त्री बद्री प्रसाद पाण्डेलाई ध्यानाकर्षण पत्र बुझाएको छ। शुक्रवार भीमदत्त नगरपालिकाका नगर प्रमुख पदम बोगटीले मन्त्री पाण्डेलाई उक्त पत्र हस्तान्तरण गरेका हुन्।
ध्यानाकर्षण पत्रमा उल्लेख भएअनुसार, वि.सं. २०२३-२४ मा निर्मित र २०५६ सम्म सञ्चालित महेन्द्रनगर विमानस्थलको पुनर्निर्माण तथा विस्तारका लागि वि.सं. २०७७ फागुन ३ गते तीन तहका सरकार (भीमदत्त नगरपालिका १५%, दोधाराचाँदनी नगरपालिका १०%, सुदूरपश्चिम प्रदेश सरकार २५%, र सङ्घीय सरकार ५०%) बीच सहलगानी सम्झौता भएको थियो। ठेक्का प्रक्रिया पूरा भएर निर्माण कार्य सुरु भए पनि बजेट अभाव र आवश्यक निर्णयहरूको कमीले निर्माण कार्य प्रभावित भएको छ।
विशेषगरी, विमानस्थलको दक्षिणतर्फको ६६५ मिटर क्षेत्र (रत्न वाटिका र नेपाली सेनाले खेलमैदानका रूपमा प्रयोग गरेको क्षेत्र), जुन वि.सं. २०५१ को राजपत्रमा विमानस्थल क्षेत्रका रूपमा घोषित छ, सो क्षेत्रको व्यवस्थापन र बजेट अभावका कारण निर्माण कार्य अलपत्र परेको समितिको भनाइ छ।
विमानस्थल पुन: सञ्चालन समितिका सचिव राजेन्द्र बहादुर चन्दले मन्त्री पाण्डेको कार्यकालमा विमानस्थल निर्माण सम्पन्न गरी सञ्चालनमा ल्याउन पहल गर्न आग्रह गरेको बताए। उनले भने, “हामीले विमानस्थलका समग्र समस्याहरूबारे जानकारी गराएर ध्यानाकर्षण पत्र बुझाएका छौँ। आशा छ, मन्त्रीज्यूले कञ्चनपुर बासीको आवाज सुनिदिनुहुनेछ।”
मन्त्री पाण्डेले पत्र बुझ्दै विमानस्थल निर्माणलाई प्राथमिकतामा राखी आवश्यक निर्णय र बजेट व्यवस्थापनका लागि पहल गर्ने प्रतिबद्धता जनाए। उनले आगामी आर्थिक वर्षमा टर्मिनल भवनका लागि बजेट छुट्ट्याएर ठेक्का प्रक्रिया अगाडि बढाउने समेत बताए।
महेन्द्रनगर विमानस्थलको निर्माणले कञ्चनपुरलगायत सुदूरपश्चिम प्रदेशको पर्यटन, व्यापार र यातायातमा महत्त्वपूर्ण योगदान पुग्ने अपेक्षा गरिएको छ।
Discussion about this post