बिकास सिहं महता, कञ्चनपुर । कञ्चनपुर जिल्लामा विपन्न तथा यौनिक र लैङ्गिक अल्पसंख्यक समुदायलाई खाद्यान्न सहयोग वितरण गरिएको छ। शुक्रबार सामाजिक विकास कार्यालय कञ्चनपुरले आयोजना गरेको एक कार्यक्रममार्फत एचआईभी/एड्स सङ्क्रमित र यौनिक तथा लैङ्गिक अल्पसंख्यक समुदायलाई खाद्यान्न सामग्री प्रदान गरिएको हो।
सामाजिक विकास कार्यालयका प्रमुख गोपाल दत्त जोशीको अध्यक्षता र जिल्ला समन्वय समिति कञ्चनपुरका प्रमुख दुर्गा दत्त बोहराको प्रमुख आतिथ्यतामा आयोजित कार्यक्रममा खाद्यान्न वितरण गरिएको थियो।
गैरसरकारी संस्था सहयात्रा नेपाल, नवआशा र एनएनएसडब्ल्यू कञ्चनपुरको समन्वयमा जिल्ला समन्वय समितिको सभाहलमा ३० जना एचआईभी सङ्क्रमित र १५ जना यौनिक तथा लैङ्गिक अल्पसंख्यक समुदायका व्यक्तिलाई चामल, दाल, तेललगायत खाद्यान्न सामग्री वितरण गरिएको प्रमुख जोशीले बताए।
“विपन्न वर्गमा पर्ने एचआईभी सङ्क्रमित र यौनिक तथा लैङ्गिक अल्पसंख्यक समुदायका लागि के गर्न सकिन्छ भन्ने विषयमा गैरसरकारी संस्थाहरूसँग छलफल गरी उनीहरूले उपलब्ध गराएको नामावलीका आधारमा राहतस्वरूप खाद्यान्न सहयोग गरेका हौं,” जोशीले भने। उनले आगामी दिनमा पनि कार्यालयबाट सम्भव भएसम्म सहयोग जारी रहने प्रतिबद्धता व्यक्त गरे।
कार्यक्रमका प्रमुख अतिथि जिल्ला समन्वय समिति प्रमुख दुर्गा दत्त बोहराले सामाजिक कार्यमा गैरसरकारी संस्थाहरूको उल्लेखनीय योगदानको प्रशंसा गरे। “सामाजिक उत्तरदायित्वमा सबैको समन्वयकारी भूमिका भए झनै प्रभावकारी हुन्छ,” उनले भने, “आगामी दिनमा सरकारी र गैरसरकारी संस्थाहरूले थप उत्साहका साथ यस्ता कार्यमा सहभागिता जनाउन म आग्रह गर्छु।”
Discussion about this post