कञ्चनपुर – नेकपा माओवादी केन्द्रले भोलि (सोमबार) देखि सुदूरपश्चिम प्रदेशमा ‘जनतासँग माओवादी तराई–मधेश जनजागरण अभियान’ सञ्चालन गर्ने भएको छ। हुलाकी राजमार्गलाई केन्द्रित गर्दै सञ्चालित यो अभियान कैलालीको टीकापुरबाट सुरु भई कञ्चनपुरको महेन्द्रनगरमा पुगेर समापन हुनेछ।
गत फागुनमा झापाबाट सुरु भएको यो अभियान लुम्बिनी प्रदेश हुँदै सुदूरपश्चिम पुगेको हो। माओवादी केन्द्रका केन्द्रीय सदस्य ओम विक्रम भाट (सरल) का अनुसार, वैशाख १५ देखि १७ गतेसम्म सुदूरपश्चिममा अभियान सञ्चालन हुनेछ। अभियानको तयारी कैलाली र कञ्चनपुरमा तीव्र रूपमा भइरहेको उनले बताए।
अभियानको पहिलो दिन वैशाख १५ गते पार्टी अध्यक्ष पुष्पकमल दाहाल ‘प्रचण्ड’ कैलालीको टीकापुर पुग्नेछन्। टीकापुरस्थित सती कर्णाली पुलमा स्वागतसहित अभियान सुरु हुनेछ। सो दिन बिहान मर्निङ वाक, सहिद परिवारसँग भेटघाट, टीकापुर झुंगामा जनसभा, बैसनपुर धनगढीमा सहिद परिवारसँग अन्तरक्रिया र धनगढी भन्सारदेखि डोकेबजार हुँदै कञ्चनपुर प्रवेश गरिनेछ।
वैशाख १६ गते कञ्चनपुरको डोकेबजारबाट हुलाकी राजमार्ग केन्द्रित अभियान अघि बढ्नेछ। पुनर्वास नगरपालिकामा स्वागत र भेटघाट, मोतीबस्तीमा सहिद परिवारसँग छलफल, रामनगरमा खानेपानी उद्घाटन, सहिदको सालिकमा माल्यार्पण, शोभाताल अवलोकन, बेलडाँडी र बेदकोटमा स्वागत तथा भेटघाट कार्यक्रम हुनेछ।
अभियानको अन्तिम दिन वैशाख १७ गते भीमदत्त नगरपालिका–४, महेन्द्रनगरको संविधान चोकमा जनसभा आयोजना गरी अभियान समापन गरिनेछ। अभियानमा पूर्वप्रधानमन्त्रीसमेत रहेका माओवादी अध्यक्ष प्रचण्डसहित शीर्ष नेताहरूले सम्बोधन गर्नेछन्।
नेकपा माओवादी केन्द्र कञ्चनपुरका संयोजक खेमराज पाण्डेयले अभियानलाई सफल बनाउन नेता–कार्यकर्ताहरू जिम्मेवारीअनुसार खटिएको बताए। “पार्टीको हुलाकी राजमार्ग केन्द्रित अभियानको समापन कञ्चनपुरमा हुँदैछ, हामी चरणबद्ध बैठक र जिम्मेवारीअनुसार युद्धस्तरमा लागेका छौँ,” उनले भने।
सुदूरपश्चिम प्रदेशका इन्चार्ज गिरीराजमणी पोखरेलसहित कैलाली र कञ्चनपुरका नेता–कार्यकर्ताहरू अभियान सफल बनाउन सक्रिय छन्। यो अभियानले पार्टी र जनताको हितमा महत्त्वपूर्ण योगदान पु¥याउने नेताहरूको विश्वास छ।
Discussion about this post