कञ्चनपुर — कञ्चनपुरको शुक्लाफाँटा नगरपालिका-१० झलारीस्थित सुनबरा नदीको बगरमा आधुनिक सुविधा सम्पन्न कभर्डहल निर्माण र उद्घाटन सम्पन्न भएको छ। नगरपालिकाले आफ्नै स्रोतमा सुनबरा नदीको कटानले बगरमा परिणत भएको क्षेत्रलाई सदुपयोग गरी खेलकुद विकासका लागि यो पक्की भवन निर्माण गरेको हो।
शुक्लाफाँटा नगर प्रमुख रणबहादुर महराले खेलाडीको विकास र खेलकुद प्रवर्द्धनका लागि कभर्डहल निर्माण गरिएको बताए। “यो कभर्डहल हामीले ३ करोड ५० लाखको बजेटमा २ करोड ६९ लाखमा निर्माण सम्पन्न गरेका हौँ,” उनले भने, “खेलकुद विकास हाम्रो निर्वाचनको प्रमुख एजेन्डा थियो, र यो नगरको गौरवको योजना हो।” कभर्डहलमा दुईवटा ब्याडमिन्टन कोर्ट, प्यारापिट, चेन्जिङ रूम, शौचालयजस्ता सुविधाहरू समावेश छन्।
नगर प्रमुख महराले आगामी दिनमा कभर्डहल परिसरमै खेलमैदान निर्माण गर्ने योजना रहेको खुलासा गरे। “बजार नजिकै बनाइएको यो भवनले इनडोर प्रतियोगिता आयोजना गर्न सहज हुनेछ। अब नगरका खेलाडीले बाहिर गएर खेल्नुपर्ने बाध्यता हट्नेछ,” उनले थपे।
नगरपालिकाका इन्जिनियर दिपक धामीका अनुसार, एसएनएस जयलक्ष्मी जेभीले २०७९ असारबाट निर्माण सुरु गरी २०८१ कार्तिकमा कभर्डहल निर्माण सम्पन्न गरेको हो। नगरका प्रमुख प्रशासकीय अधिकृत खेमराज विष्टले कभर्डहल सञ्चालनको जिम्मेवारी नगर खेलकुद समितिलाई दिइएको र यसलाई नियमित सञ्चालन गरी खेलकुद विकासमा योगदान पुर्याउने योजना रहेको बताए।
शुक्लाफाँटा नगर खेलकुद समितिका अध्यक्ष चक्र साउदले यसअघि इनडोर खेलकुद सुविधाको अभावमा खेलाडीले समस्या झेल्नुपरेको उल्लेख गरे। “अब यो कभर्डहलले खेलाडीलाई सहजता प्रदान गर्नेछ,” उनले भने।
स्थानीयवासीले पनि कभर्डहल निर्माणबाट उत्साह व्यक्त गरेका छन्। स्थानीय अनिता नेपालीले कभर्डहलले खेलाडीको चहलपहल बढ्ने र यस क्षेत्रको विकासमा योगदान पुग्ने बताइन्। यद्यपि, उनले कभर्डहल र गाउँबस्ती जोगाउन नदीको तटबन्ध आवश्यक रहेको सुझाएकी छन्।
यो कभर्डहलले शुक्लाफाँटा नगरपालिकामा खेलकुद क्षेत्रको विकासमा महत्त्वपूर्ण योगदान पुग्ने अपेक्षा गरिएको छ।
Discussion about this post