सिद्धनाथ मन्दिर व्यवस्थित बन्दै, पूर्णागिरीका दर्शनार्थीलाई सहज

कञ्चनपुर – सुदूरपश्चिम प्रदेशको कञ्चनपुरस्थित भीमदत्त नगरपालिका–४ मा अवस्थित प्राचीन सिद्धनाथ मन्दिरमा पूर्णागिरी मेलाका दर्शनार्थीको आकर्षण बढ्दै गएको छ। चैत्रेदशैँदेखि मन्दिरमा दर्शनार्थीको दैनिक घुइँचो लाग्ने गरेको छ। फागुन पूर्णिमादेखि असार औँसीसम्म सञ्चालन हुने पूर्णागिरी मेलाका लागि भारतको उत्तराखण्ड चम्पावत र नेपालको महेन्द्रनगर तथा ब्रह्मदेवमा एकसाथ मेला लाग्ने गर्छ।

सिद्धनाथ मन्दिर समितिका मूल पुजारी पुष्करराज उप्रेतीका अनुसार पूर्णागिरी माताको दर्शनपछि सिद्धनाथ मन्दिरको दर्शन गरेमा मनोकामना पूरा हुने जनविश्वास छ। “पहिले यो मन्दिर ब्रह्मदेवमा थियो, जहाँ महाकाली नदी तरेर आउन जोखिमपूर्ण थियो,” उनले भने, “त्यसैले २०१८ साल फागुन १८ गते महेन्द्रनगरमा सिद्धनाथको शिला ल्याएर मन्दिर स्थापना गरियो।” त्यसयता दर्शनार्थीको सङ्ख्या क्रमिक रूपमा बढ्दै गएको र वार्षिक एक लाखभन्दा बढीले मन्दिरको दर्शन गर्ने गरेको उनले बताए। यस वर्ष पनि यस्तै सङ्ख्या पुग्ने अपेक्षा छ।

मन्दिर समितिका कार्यवाहक महासचिव चन्द्रकान्त भट्टले दर्शनार्थीको सुविधाका लागि गेट निर्माण, बजार व्यवस्थापन, शौचालय, सिसिटिभी, अस्थायी सुरक्षा गार्डलगायतका सुविधा थपिएको जानकारीग जानकारी दिए। “दर्शनार्थीको सङ्ख्या बढाउन सरोकारवालाले भूमिका खेल्नुपर्छ,” उनले भने, “यसले जिल्लाको आर्थिक समृद्धिमा योगदान पुर्‍याउँछ।”

जिल्ला समन्वय समितिका प्रमुख दुर्गादत्त बोहराले मन्दिरको ऐतिहासिक र धार्मिक महत्त्व अन्तर्राष्ट्रिय स्तरमा प्रचार गर्नुपर्नेमा जोड दिए। उनले सीमा क्षेत्रमा हुने चेकजाँचको झन्झट हटाएर दर्शनार्थीलाई सहज बनाउनुपर्ने बताए। “सीमा क्षेत्रको कडाइले भारतीय दर्शनार्थी बनबासा पुलमै फर्किन्छन्। सहज वातावरण बनाए नेपालको धार्मिक पर्यटन प्रवर्द्धन हुन्छ,” उनले भने।

कञ्चनपुर उद्योग वाणिज्य सङ्घका उपाध्यक्ष धर्मसिंह रावलले मन्दिरमा दर्शनार्थीलाई मन्दिरको वातावरण अनुभूति गराउन भौतिक संरचना र सुविधा विस्तारमा जोड दिनुपर्ने बताए। “दर्शनार्थीले यहाँको बजारबाट सामान खरिद र खानपान गर्छन्, जसले स्थानीय अर्थतन्त्र चलायमान हुन्छ,” उनले भने।

मन्दिर समितिका कार्यवाहक अध्यक्ष कैलाश भट्टले मन्दिरलाई प्रदेशकै प्रमुख धार्मिक पर्यटकीय गन्तव्य बनाउने योजना रहेको बताए। “प्रचारप्रसार र सुविधा विस्तारमा हामीले बृहत् योजना बनाएका छौँ। सबैको सहयोग आवश्यक छ,” उनले भने।

पूर्णागिरी मेलाले धार्मिक महत्त्वसँगै स्थानीय बजार र पर्यटन प्रवर्द्धनमा महत्त्वपूर्ण योगदान पुर्‍याउँदै आएको छ। मन्दिर व्यवस्थापनले आगामी दिनमा थप सुधार र प्रचारप्रसारमा जोड दिने जनाएको छ।