कञ्चनपुर । आइतबार भएको इन्डियन प्रिमियर लिग (आईपीएल) को दोस्रो खेलमा राजस्थान रोयल्सले चेन्नई सुपर किङ्सलाई ६ रनले पराजित गर्दै आफ्नो पहिलो जित दर्ता गरेको छ ।
चेन्नई १८३ रनको लक्ष्य पछ्याउने क्रममा ६ विकेट गुमाएर १७६ रनमै समेटियो । कप्तान ऋतुराज गाइक्वाडले टोलीका लागि सर्वाधिक ६३ रन बनाए, जसमा ७ चौका र १ छक्का समावेश थियो ।
बलिङतर्फ राजस्थानका जोफ्रा आर्चरले सुरुवाती तीन ओभरमै उत्कृष्ट प्रदर्शन गर्दै १३ रन खर्चेर १ विकेट लिए । वानिन्दु हसरङ्गाले ४ ओभरमा ३५ रन खर्चेर महत्वपूर्ण ४ विकेट लिए ।
यसअघि, टस गुमाएर पहिले ब्याटिङ गरेको राजस्थानले ९ विकेट गुमाएर १८२ रनको सम्मानजनक योगफल तयार गरेको थियो । नितिश रानाले ३६ बलमा ८१ रन प्रहार गर्दै टोलीलाई बलियो आधार दिए । उनको विस्फोटक इनिङ्समा १० चौका र ५ छक्का समावेश थिए । उत्कृष्ट प्रदर्शन गरेपछि उनी ‘प्लेयर अफ द म्याच’ घोषित भए ।
कप्तान रियान परागले २८ बलमा ३७ रनको योगदान दिए । चेन्नईका बलरमध्ये खालिल अहमद, नुर अहमद र मथीशा पाथिरानाले समान २-२ विकेट लिए । नुर अहमदले जारी प्रतियोगितामा ३ खेलमै ९ विकेट लिइसकेका छन् ।
घरेलु मैदानमा लगातार दोस्रो हार भोगेपछि चेन्नईले सुरुवातमै कठिनाइ सामना गर्नुपरेको छ । लगातार दुई हारपछि राजस्थानले पहिलो जित निकाल्दै सान्त्वना पाएको छ ।
त्यसैदिन भएको पहिलो खेलमा सनराइजर्स हैदरावादले दिल्ली क्यापिटल्ससँग ७ विकेटको पराजय बेहोरेको थियो । आज मुम्बई इन्डियन्स र कोलकाता नाइट राइडर्स आमनेसामने हुँदैछन् ।
