कञ्चनपुर । कञ्चनपुरका क्रियाशील पत्रकारहरूले रङ्गहरूको पर्व होलीलाई सामाजिक कार्यमा जोड्दै बिरामी र घाइते सहकर्मीहरूलाई आर्थिक सहयोग गरेका छन्। जिल्लामा सक्रिय पत्रकारहरूले होली मनाउने क्रममा सङ्कलन गरेको रकमबाट लामो समयदेखि बिरामी रहेका पत्रकार द्वय डिल्लीराज पन्त र सुजित रमेश सिनाल तथा मोटरसाइकल दुर्घटनामा परेका पत्रकार द्वय माधव पौडेल र कृष्णदत्त जोशीलाई सहयोग प्रदान गरेका हुन्।
क्रियाशील पत्रकार समूहले आफ्ना सहकर्मीहरू सङ्कटमा परेको बेला उपचारमा सहयोग गर्न यो पहल गरेको जनाएको छ। चारै जना पत्रकारलाई जनही ५ हजार १ सय रुपैयाँ नगद सहयोग हस्तान्तरण गरिएको छ। समूहका सदस्य भास्कर केसीले भने, “चौबीसै घण्टा जनताको सेवामा खटिने पत्रकार सङ्कटमा पर्दा हामीले सक्दो आर्थिक सहयोग गरेका हौँ। यो हाम्रो सानो प्रयास हो।”
सहयोग प्राप्त गरेका चारै जना पत्रकारले होली खेलेर आफ्नो उपचारका लागि सहायता जुटाएकोमा क्रियाशील पत्रकार समूहप्रति आभार व्यक्त गरेका छन्। गत वर्ष पनि यो समूहले होली खेलेर अनाथालयलाई सहयोग गरेको थियो।
रकम हस्तान्तरण कार्यक्रममा क्रियाशील पत्रकार होली समूहका अगुवा राजेन्द्र विष्ट, भास्कर केसी, प्रेस सेन्टर नेपाल कञ्चनपुरका अध्यक्ष अरुण प्रसाद भट्ट, नेपाल पत्रकार महासङ्घ कञ्चनपुरका कोषाध्यक्ष मोहन विष्ट, पत्रकार पहिलाद राना, बिमल धामी, धनसिंह धामी, रमेश कार्कीलगायतको उपस्थिति रहेको थियो। यो पहलले पत्रकारहरूबिच आपसी सहयोग र एकताको सन्देश प्रवाह गरेको छ।
Discussion about this post