महेन्द्रनगर । दिल्ली विधानसभा चुनावमा भारतीय जनता पार्टी (भाजपा) विजयी भएको छ । भारतीय निर्वाचन आयोगका अनुसार ७० सदस्यीय विधानसभामा भाजपाले ४८ सिट जितेको हो । योसँगै भाजपाले २७ वर्षपछि दिल्लीमा सरकार बनाउने भएको छ । दिल्लीमा सरकार गठनका लागि ३६ सिट आवश्यक पर्छ ।
सत्तारूढ आम आदमी पार्टी (आप) ले २२ सिटमा खुम्चिएको छ । चुनावमा आप प्रमुख तथा पूर्वमुख्यमन्त्री अरविन्द केजरीवाल पराजित भएका छन् । केजरीवाल भाजपाका प्रवेश बर्मासँग ४ हजार ८९ मतान्तरले पराजित भएका हुन् ।
दिल्लीका पूर्वउपमुख्यमन्त्री मनिष सिसोदिया पनि पराजित भएका छन् । उनी भाजपा उम्मेदवार तरविन्दर सिंह मारवाहसँग पराजित भएका हुन् । चुनावमा वर्तमान मुख्यमन्त्री आतिशी भने विजयी भएकी छन् ।
स्थानीय सञ्चार माध्यमहरूका अनुसार उनले भाजपाका रमेश बिधुडीलाई ३ हजार ५ सय मतले पराजित गरेकी हुन् । भारतको संघीय संसद्को प्रमुख प्रतिपक्षी दल भारतीय नेशनल कंग्रेसले भने कुनै पनि सिट जित्न सकेन ।
आप प्रमुख केजरीवालले चुनावी हार स्वीकार गर्दै भाजपालाई बधाई दिएका छन् । ’जनताको फैसलालाई हामी पूर्ण रूपमा विनम्रताका साथ स्वीकार गर्छौं,’ सामाजिक सञ्जालमा प्रेषित भिडियो सन्देशमा केजरीवालले भनेका छन् ।
सन् २०२० को दिल्ली विधानसभा चुनावमा आप ६२ सिटमा विजयी भएको थियो । भाजपाले ८ सिट जितेको थियो ।
Discussion about this post